وزیراعظم محمد نواز شریف نا کنگ حمد یونیورسٹی آف نرسنگ اینڈ ایسوسی ایٹڈ میڈیکل سائنسز نا بنداو ءِ تخنگ نا دود آن تران

وزیراعظم محمد نواز شریف نا کنگ حمد یونیورسٹی آف نرسنگ اینڈ ایسوسی ایٹڈ میڈیکل سائنسز نا بنداو ءِ تخنگ نا دود آن تران

اسلام آباد(پاکستان نیوز پوائنٹ 06جنوری2016ء) وزیراعظم محمد نواز شریف جان جوڑی نا نگہداشت نا بشخ ءِ حکومت نا اولین اولیت آتا بشخ گوندسا پارینے کہ ملک اٹی بے کچ نیزگارمریض آتا گچینی کن گام گیج کننگ انگ ءِ۔ او جمعہ آ داڑے کنگ حمد یونیورسٹی آف نرسنگ اینڈ ایسوسی ایٹڈ میڈیکل سائنسز نا بنداو ءِ تخنگ نا دود آن تران کریکہ ۔ شاہ بحرین نا ایلم و بحرین نا کمانڈر آف نیشنل گارڈ لیفٹیننٹ جنرل شیخ حمد بن عیسیٰ بن سلمان ہم دود اٹی ساڑی ئسر۔

کنگ حمد یونیورسٹی آف نرسنگ اینڈ ایسوسی ایٹڈ میڈیکل سائنسز بحرین نا کنڈآن دا ٹیکی اسے و دانا الحاق رائل کالج آف سرجنز آئرلینڈ آن مریک۔ وزیراعظم پارے کہ ملک اٹی تربیت یافتہ نرسنگ اینڈ ٹریننگ سٹاف نا کمتی ءِ مون آ تخسا بحرین نا دا ڈٹ جان جوڑی نا نگہداشت نا بشخ انا دا گرج ءِ پورو کننگ اٹی کمک ایتک۔ اوپارے کہ نرسنگ کیئر نا بشخ ءِ ماضی ٹی نظر انداز کننگ نا سوب بھلا ویل آتا مون تروکی ءِ۔

داخاطران دا چرجوئی ٹی سنجیدہ کوشست آتا گرج ءِ۔ وزیراعظم نواز شریف پارے کہ داڈٹ آن ملک اٹی نرسنگ نا پیشہ نا معیار ودک و دا جہانی معیار آتیا پورو سلنگ کیک۔ او داڈٹ ءِ ہڑتوم آ ملک آتا نیام اٹ سوگوسنگتی نا علامت گوندسا داڑکن شاہ بحرین حمد بن عیسیٰ الخلیفہ نا منت واری ءِ ادا کرے۔ وزیراعظم نرسنگ یونیورسٹی ءِ پاکستان بحرین کمکاری ٹی شاندار ودکی گوندا و پارے کہ حکومت جان جوڑی نا بشخ انا شونداری کن پرعزم ءِ، 2015ء ٹی بناء کروک آ جان جوڑی پروگرام نا رداٹ مچ آ ملک اٹی 50پوسکن ہسپتال جوڑ جاڑ کننگک۔

داپروگرام آن 10کروڑ بندغ مستفید مریرہ۔ وزیراعظم انسداد پولیو مہم تون اوار لمہ و چناکن مفت طبی آسراتی تا فراوانی نا ہم ذکر ءِ کرے۔ داوخت آ وزیرمملکت ہیلتھ سروسز سائرہ افضل تارڑ تینا تران اٹی ڈٹ انا نمان خدوخال پیش کرسا پارے کہ دااسٹیٹ آف دی آرٹ یونیورسٹی پاکستان اٹی نرسنگ نا بشخ ءِ بدل کیک۔ اوپارے کہ 237کنا ل نا رقبہ غا جوڑ جاڑ مروک آ نرسنگ یونیورسٹی 2ہزار طالب علم آتا گرج آتے پورو کیک و داٹی سالانہ 500 طالب علم داخل کننگک۔

داکان بیدس اسہ ہزار طالب علم آتے ہنکین نا آسراتی ہم تننگک۔ وزیر مملکت پارے کہ دا یونیورسٹی آن فارغ مروک آ طالب علم آتے ہندی و جہانی مارکیٹ اٹی امتیازی حیثیت دوئی مریک۔ داکان مست وزیراعظم محمد نواز شریف لیفٹیننٹ جنرل شیخ حمد بن عیسیٰ بن سلمان تون اوار کنگ حمد نرسنگ یونیورسٹی اینڈ ایسوسی ایٹڈ میڈیکل سائنسز نا تختی نا نقاب کشائی ءِ کریر۔ بحرین اٹی پاکستان نا سفیر جاوید ملک وزیراعظم ءِ ڈٹ انا بارواٹی بریفنگ تس۔