اسلام آباد (پاکستان پوائنٹ نیوز۔26 جولائی۔2016) وزیراعظم محمد نواز شریف برطانوی وزیراعظم تھریسامے ءِ غٹ بشخ آتیٹی خڑکی ہڑتوم آ کنڈآتا تعلقداری تا دوئی کن اوڑتون خڑکی وڑاٹ کاریم کننگ کن تینا مخ تفی نا درشانی ءِ کرینے۔ سے شنبے آ برطانوی وزیراعظم تون ٹیلی فون آ ہیت وگپ کرسا اوتھریسامے ءِ برطانیہ نا وزارت عظمیٰ نامنصب سنبھالنگ آ جم و جوش اٹ مبارکبادی تس۔
اوپارے کہ تھریسامے نا بطور وزیراعظم تقرری برطانوی الس نا پت انا درشانی ءِ۔ وزیراعظم نواز شریف داعزم انا درشانی ءِ کرے کہ پوسکنا برطانوی وزیراعظم نا سروکی و وژن نا رداٹ برطانیہ پین سوگو مریک و جہانی معاملہ غاتے ٹی تینا کڑد ءِ ادا کرسا کیک۔ وزیراعظم پارے کہ پاکستان نا حکومت و الس پاکستان تون اونا سریس وابستگی ءِ قدرانا نظراٹ ہرک۔
وزیراعظم پارے کہ برطانیہ پاکستان نا روایتی اتحادی ، خڑکی دوست و آزموندہ شریدار ءِ۔ تھریسامے وزیراعظم محمد نواز شریف نا جوزہ غاتیا منت واری ءِ ادا کرسا پارے کہ پاکستان برطانیہ نا باپت اتحادی ملک ءِ۔ اووزیراعظم ءِ باوری ترفے کہ یورپی یونین آن برطانیہ نا جتائی آن گڈ ہڑتوم آ ملک آک اواری اٹ کاریم کرسا کیرہ۔ اوپار ے کہ یورپی یونین آن جتائی نا ہڑتوم آ کنڈآتا تعلقداری آ ہچ ءُ منفی زئم اس تمپک۔
اوپارے کہ پاکستان و برطانیہ ہڑتوم آ کنڈآتاشریدار آتا وڑاٹ اواری اٹ کاریم کیرہ۔ اوپارے کہ برطانیہ سیکورٹی امور و جمہوریت ءِ سوگو جوڑ کننگ کن پاکستان تون کاریم کننگ کن پرعزم ءِ۔ تھریسامے پارے کہ برطانیہ پاکستان اٹی جمہوری نظام نا ٹھوس مخ تفی ءِ کیک انتئے کہ پاکستان نا شون و جمہوریت نا مون آ دننگ اسہ ایلو تون تین پہ تین گنڈوک ءُ۔ اوپارے کہ او برطانوی وزیراعظم نا حیثیت آن پاکستان نا دورہ نا چاری ءِ۔ اوکان مست اونا دورہ ہمووخت طے مسوسس ہراتم او وزیرداخلہ ئسک۔
