اسلام آباد(پاکستان نیوز پوائنٹ 06جنوری2016ء) پاکستان مسلم لیگ (ن) نا راہشون طلال چودھری پارینے کہ تحریک انصاف پانامہ لیکس کیس اٹی غیر مصدقہ دستاویز آتے جمع کرفے، 2006ء آن مست فلیٹ آتا ملکیت شریف خاہوت ءِ آخا بلکن دوبہ خلوک آ کڑد ہ ءِ ثابت کروئی ءِ ، تحریک انصاف وزیراعظم محمد نواز شریف ءِ پاناما کیس اتون گنڈنگ کن عدالت اٹی دروغ تڑے ولے او اینو اسکان مریم نواز شریف نا محمد نواز شریف نا زیر کفالت مننگ نا تینا داوا ءِ ثابت کننگ کتو۔
او جمعہ آ پاناما پیپرز نا سماعت آن پد سپریم کورٹ نا پیشن میڈیا تون ہیت وگپ کریکہ۔ اوپارے کہ دا کیس بھاز سادہ ءِ، تحریک انصاف چار سوج آتے چست کرینے ہرافتے ٹی 1990ء ٹی لندن اٹی ساڑی پراپرٹی نا شریف خاہوت نا ملکیت مننگ، غٹ پراپرٹی ءِ منی لانڈرنگ اٹی جوڑ کننگ، مریم نواز نا میاں نواز شریف نا زیر کفالت مننگ و مریم نواز نا غٹ پراپرٹی نا بینی فیشل مننگ اوار ءِ۔
اوپارے کہ عدالت اٹی نیمہ غان زیات کیس پی ٹی آئی نا وکیل آک تینٹ ایسر کرینو و اگہ بیان آتا چرجوئی پین اِرادے اسکان برجاسلیس تو مچ انا مچ آ کیس ہی چٹک و ننے دلیل تننگ نا گرج ہی پیش بفک۔ طلال چوہدری پارے کہ پی ٹی آئی نا وکیل آک اینو اسکان ہچ اس ثابت کننگ کتنو۔ مریم نواز ءِ محمد نواز شریف نا زیر کفالت مننگ نا شاہدی ءِ ہم پیش کننگ تنے ، ہرباشعور بندغ دا سمجھک کہ مریم نواز برامی و ٹیکس ادا کروک ءُ شاری اسے۔
اوپارے کہ تحریک انصاف خلقت ءِ ورغلائفنگ و میاں نواز شریف ءِ کیس اٹی اوار کننگ کن عدالت نا مون آ دروغ تڑینے ، اگہ پی ٹی آئی مریم نواز ءِ نواز شریف نا زیر کفالت مننگ نا شاہدی ءِ پیش کننگ کتو تو صفا مریک کہ داسہ دا کیس اتون محمد نواز شریف نا ہچ ءُ تعلق اس سلتو ولے داسہ دا کیس صرف وصرف شریف خاہوت نا چناتا ہی خلاف سلک۔ اومستی پارے کہ اینومریم نواز نا کنڈآن عدالت اٹی میڈیا غا چلینگوک آ انٹرویوز و ٹیکس انا ادائیگی نا کاغد آتے ہم جمع کرفنگانے اوکان پد تحریک انصاف لاجواب مسنے۔
