ڈیرہ مراد جمالی (پاکستان پوائنٹ نیوز۔26 جولائی۔2016) وزیراعلیٰ بلوچستان نا سلاہکار معدنیات و قدرتی وسیلہ باسک صوبائی اسمبلی حاجی محمد خان لہڑی پارینے کہ صوبہ بلوچستان ءِ شون تننگ ننا غٹ انا زمہ واری ٹی اوڑدہ ءِ۔ مسلم لیگ (ن) اقتدار ہم صوبہ نا شون نا عزم اتون قبول کریسس، وزیراعظم محمد نواز شریف و وزیراعلیٰ بلوچستان نواب ثناء اللہ خان زہری ملک و صوبہ نا شون اکن دے و نن کوشست کننگ ءِ۔
داخیال آتا درشانی ءِ او مسلم لیگ ن لیبرونگ نا ڈویژنل صدر لعل بخش لہڑی نا سروکی ٹی ملوک آ ڈل اتون ہیت وگپ کرسا کرے۔ صوبائی سلاہکار حاجی محمد خان لہڑی پارے کہ وزیراعظم محمد نواز شریف صوبہ بلوچستان نا شون و پسماندگی نا چٹفنگ کن سنجیدگی اٹ دے و نن کاریم کننگ ءِ، بنجائی حکومت نا کنڈآن صوبہ نا شون اکن ارب آ روپئی نا خڑچ آن کاریم جاری ءِ۔
کوئٹہ ٹی شونداری کاریم تے کن وزیراعظم نا کنڈآن بھاز بھلو پیکج اس تننگانے ہراڑآن کوئٹہ شار اٹی شونداری کاریم نا بناء کننگانے و روڈ آتا جال اس شاغنگ انگ ءِ۔ اوپارے کہ صوبہ نا پی ایس ڈی پی فنڈز آن تینا حلقہ پی بی 29تمبوٹی کروڑ آ روپئی نا خڑچ آن بلیک ٹاپ روڈ، اسکول، لائیو اسٹاک و ہیلتھ بنجاء نا بلڈنگ جوڑ کننگ انگ ءِ ، سد آ خلق آتے ٹی بجلی نا پوسکن ءُ ٹرانسفر و پوسکن ءُ لین شاغنگ انگ ءِ و داسال ہم فنڈز ریلیز مننگ تون ہی پوسکن آ اسکیم تیا کاریم نا بناءِ کننگک۔
اوپارے کہ نن انفرادی کاریم تیان بیدس اجتماعی وڑنا کاریم تیا یخین تخنہ و علاقہ نا پسماندگی ءِ مون آ تخسا غٹ اسکیم آتے اجتماعی نوعیت نا جوڑ کننگانے تانکہ دا اسکیم آتیان علاقہ ٹی رہینگوک آ غٹ بندغ آک مستفید مننگ کیر۔ حاجی محمد خان لہڑی پارے کہ مسلم لیگ ن نا حکومت اٹی صوبہ آن زوت ہی تہاری تا سما چٹسا ہر جاگہ غا روشناہی ہی روشنائی مریک۔
