کوئٹہ(پاکستان نیوز پوائنٹ 05جنوری2016ء) پاکستان مسلم لیگ (ن) نا سینئر راہشون باسک صوبائی اسمبلی میر غلام دستگیر بادینی پارینے کہ بنجائی و صوبائی حکومت بلوچستان نا شونداری کن میگاپروجیکٹ آتیا توجوہ تننگ ءِ پاک چین اقتصادی راہداری ڈٹ صوبہ نا تقدیر ءِ بدلیفک شونداری و شونہالی نا دورانا بناء مسنے نوشکی ٹی کیہی شونداری ڈٹ آتیا کاریم برجاءِ۔
داہیت ءِ او پنچ شنبے نا دے ”اے پی پی “ تون ہیت وگپ کرسا پارے ۔ اوپارے کہ پاک چین اقتصادی راہداری ڈٹ آن صوبہ ٹی پسماندگی و نیزگاری ٹی کمتی اتنگ کن کیہی علاقہ غاتیٹی اجتماعی شونداری ڈٹ آتیا کاریم برجاءِ ۔ وزیراعلیٰ بلوچستان صوبہ ٹی جوڑ جاڑ و شونداری آ خصوصی چکار تخنگ ءِ علاقہ ٹی صاف دیر انا فراوانی ءِ المی جوڑ کننگ انگ ءِ۔ اوپارے کہ نوشکی ٹی خصوصی فنڈ آن شونداری اسکیم تیا ترندی اٹ کاریم برجاءِ الس نا دیرینہ خواست آ کنوئی ءُ صاف دیر انا فراوانی ءِ المی جوڑ کننگ کن مستی گام گیج کننگ ءِ داسہ ہم واٹر سپلائی اسکیم تیا ترندی اٹ کاریم برجاءِ۔
اوپارے کہ صوبائی حکومت بنجاء نا کمک اٹ زوت کاریم نا بناءِ کیک السی مشکلات و ویل آتا ایسری کن است انا خلوص اٹ کاریم کننگ انگ ءِ آب انا نکاسی کن خصوصی وڑاٹ ایم پی اے فنڈ آن کاریم برجاءِ شار انا جوڑ جاڑ و شونداری آ خصوصی چکار کننگ انگ ءِ تانکہ الس نا مشکلات آتیٹی کمتی اتنگ مرے۔
