کوئٹہ(پاکستان نیوز پوائنٹ 02جنوری2016ء) کمشنر کوئٹہ ڈویژن امجد علی خان پارینے کہ حکومتی گام گیج و الس نا کمک نا بدولت 2017ء پولیو نا موذی مرض انا چٹفنگ نا سال مریک، انسداد پولیو مہم نا سرسہبی کن لمہ و باوہ ، عالم دین، قبائلی سرکڑدہ ، بلدیاتی اومیت دار آتا کونسلر ، سول سوسائٹی ، سیاسی و مذہبی جماعت آتون اوار غٹ تپہ نا خلقت نا کمک المی ءِ، پولیو مہم نا بابت سیکورٹی نا فرض ایف سی، پولیس ولیویز نا کارندہ غاک انجام ایترہ۔
داخیال آتا درشانی ءِ او دوشنبے آ انسداد پولیو مہم نا مانیٹرنگ نا چرجوئی ٹی کوئٹہ نا کیہی علاقہ غاتا دورہ ناوخت آ ہیت وگپ کرسا کرے۔ امجد علی خان پارے کہ صوبائی دارالحکومت کوئٹہ ٹی پنچ سال آن کم وئی نا چناتے پولیو پڑی کنفنگ کن 1345ٹیم جوڑ کننگانے ہرا اُرا اُرا غا ہنسا چناتے پولیونا پڑی کنفرہ وخت اس کہ ریلوے اسٹیشن ، بالی پٹ ، بس اڈہ غاتون اوار ایلو پبلک ہند آتیا ہم قوم انا معمار تے انسداد پولیو مہم نا وخت آ پولیو نا پڑی کنفنگ کن خصوصی پلان مرتب کننگانے۔
اوپارے کہ پھل کون آ چناتے معذوری نا زند آن بچفنگ کن پولیو مہم ءِ سرسہب جوڑ کننگ کن پولیو ورکرز و ضلعی انتظامیہ نا کارندہ غاک تینا ڈیوٹی ءِ پورو ایمانداری اٹ ادا کرسا پولیو مہلک مرض انا چٹفنگ اٹی تینا پبی کڑد ءِ ادا کیر۔ کمشنر کوئٹہ ڈویژن لمہ و باوہ غاتیان خواست کرے کہ او تینا چناتا روشن آخبت کن پورو ورکرز و محکمہ جان جوڑی نا ٹیم آتون پبی کمک کیر انتئے کہ پولیو مہم ءِ سرسہبی اٹ ہمکنار کرسا ہی نن تینا آخبت نا معمار تا زند آتے رکھ جوڑ کننگ کینہ۔
