اسلام آباد(پاکستان نیوز پوائنٹ 02جنوری2016ء) بنجائی وزیر خزانہ سینیٹر اسحاق ڈار پارینے کہ حکومت مچ آ ملک اٹی ڈیجیٹلائزیشن نا مون آ دننگ کن پرعزم ءِ تانکہ پائیدار شونداری کن خلقت نا مالیاتی خذمت آتیا رسینگ ءِ ودفنگ مرے۔ او دوشنبے آ یونیورسل سروس فنڈ(یو ایس ایف) و وزارت انفارمیشن ٹیکنالوجی نا نیام اٹ معاہدہ غا دستخط کننگ نا دود آن تران کریکہ۔
معاہدہ نا مسخت بلوچستان نا علاقہ آواران و لسبیلہ ٹی آپٹک فائبر شاغنگک ہرانا کنٹریکٹ یوفون ءِ تننگانے۔ اوپارے کہ حکومت مچ آ ملک اٹی خلقت ءِ گچین خذمت آتا فراوانی کن تکنیکی و مالیاتی شمولیت نا پروگرام آ کاریم کننگ ءِ۔ اوپارے کہ ساڑ ی حکومت نا گچین پالیسی تا سوب دونیم سال انا چنکو وخت اسے ٹی ملکی معیشت گچین مسنے، داوخت توانائی نا ڈٹ آتیا خصوصی چکار کننگانے ہرانا مسخت لوڈشیڈنگ نا مون ءِ توننگ نا ءِ ۔
اسحاق ڈار پارے کہ ملکی معیشت منفی آن سوگو و داسہ مثبت رینکنگ دوئی کرینے۔ اوپارے کہ ٹیلی کام سپیکٹرمز نا 6شفاف نیلامی تیان 160 ارب روپئی قومی خزانہ ٹی جمع مسنے وخت اس کہ ٹیلی کام سپیکٹرمز آن دوئی مروک آ کٹیا 200 ارب روپئی اسکان رسینگ نا اومیت ءِ۔ وزیر خزانہ پارے کہ حکومت الس ءِ انٹرنیٹ و موبائل نا آسراتی فراوان کننگ کن پرعزم ءِ۔ دا چرجوئی ٹی خلقی علاقہ غاتے ہم نیٹ ورک اٹی اوار کننگک۔ اوپارے کہ اسہ سد بندغ نا آبادی ناحامل خلق آتے ہم نیٹ ورک اٹی اتنگک ۔ داکان مست وزیر مملکت انفارمیشن ٹیکنالوجی انوشہ رحمان ٹیلی کام سیکٹر نا جم اٹنگا کارکڑد نا بارواٹی پریزنٹیشن ہم تس۔
