اسلام آباد (پاکستان پوائنٹ نیوز۔26 جولائی۔2016) پاکستان اٹی تعینات چین نا سفیر سن وی ڈانگ پارینے کہ پاکستان و چین نا نیام اٹ سنگتی و کمکاری نا بھلو رشتہ اسے، و اقتصادی راہداری آن نہ صرف ہڑتوم آ ملک بلکن ڈیہہ نا ایلو ملک آتے ہم فائدہ رسینگک۔ سی پیک آ کاریم ترندی اٹ مون آ ہِننگ ءِ ، سی پیک ڈٹ ءِ مون آ ہنسا مالیات، سائنس و ٹیکنالوجی و ایلو بشخ آتسکان ودفنگک۔
داخیال آتا درشانی ءِ او سے شنبے آ داڑے چین نا سدرن ایئر لائنز نا دود آن تران کرسا کرے۔ چینی سفیر پارے کہ چین پاکستان اقتصادی راہداری ڈٹ چینی صدر نا وژن نا عکاسی ءِ، چین پاکستان ءِ تینا آئرن فرینڈ سرپند کیک، چین پاکستان اقتصادی راہداری صرف چین و پاکستان نا نیام اٹ کمکاری ءِ ودفنگ کن حکمت عملی نا پن اف بلکن دا دامچ آ ڈیہہ نا شون و شونہالی کن اہم کڑد ادا کیک۔
اوپارے کہ پاکستان و چین نا نیام اٹ ہردے نا بنداو آ ہڑتوم آ کنڈآتا جہاز آک ہِننگ ءُ ، اومیت ءِ کہ دا جہاز آتا کچ اٹی آخبت اٹی ودکی مریک۔ اوپارے کہ سی پیک قابل عمل ڈٹ انا دروشم اس اختیارکرینے ، سی پیک آ کاریم نا رفتار مثبت و جامع ءِ۔ اوپارے کہ فضائی رابطہ غاتیان ودکی ٹی تین پہ تینی واپار و خلقت آتا رابطہ ٹی ودکی مریک۔ چینی سفیر پارے کہ فضائی رابطہ غاتے ٹی ودکی آن سی پیک نا ڈٹ اٹی ہم ترندی بریک۔
چینی سفیر پارے کہ اقتصادی راہداری ہڑتوم آ ملک آتا نیام اٹ اہم بشخ آتے ٹی کمکاری آ مبنی گام گیج و ڈٹ آتا جامع پیکج ءِ ہراٹی احوالی نیٹ ورک ، بنداوی ڈھانچہ ، توانائی ، صنعت ، کشت و کشار، سیل و سوات و چندی ایلو بشخ آک اوارو۔ اوپارے کہ پاکستان و چین نا الس نا نیام اٹ رابطہ غاتے مون آ دننگ نا گرج ءِ ہراڑآن ہڑتوم آملک آتا الس اسہ ایلو نا خڑک بریرہ۔
