وزیراعظم محمد نواز شریف نا آزاد کشمیر کونسل نا بجٹ دیوان آن تران

وزیراعظم محمد نواز شریف نا آزاد کشمیر کونسل نا بجٹ دیوان آن تران

مظفرآباد(پاکستان نیوز پوائنٹ 29دسمبر2016ء) وزیراعظم محمد نواز شریف پارینے کہ نن ملک اٹی افہام و تفہیم نا سیاست نا بناءِ کرسا ایلو جماعت آتا مینڈیٹ آتا شرف ءِ کرینن، اسہ ایلو ءِ سگنگ ہی جمہوریت ءِ، نن میثاق جمہوریت آ سلوک اُن، یکونیم خشت انا جتا مسیت اس جوڑ کننگ و ”میں نہ مانوں“ نا پالیسی آ چلینگوک آتا نن تون ہچ ءُ درمان اس اف۔ دا لاعلاج ءُ ویل اسے۔

پاکستان اٹی شونداری کن اخس کہ زر خڑچ مننگ ءِ اونا تاریخ اٹی ہچ ءُ مثال اس ملیپک۔ او پنچ شنبے آ داڑے آزاد کشمیر کونسل بجٹ دیوان آن تران کریکہ۔ داوخت آ صدر آزاد کشمیر سردارمسعودخان، وزیراعظم آزاد کشمیر راجہ فاروق حیدر ، بنجائی وزیر خزانہ سینیٹر اسحاق ڈار، بنجائی وزیر واپار خرم دستگیر ، بنجائی امور کشمیر و گلگت بلتستان چوہدری برجیس طاہر و ایلوفک ہم ساڑی ئسر۔

وزیراعظم پارے کہ قوم ءِ اگہ معلوم مرے کہ اوفتا حکومت اوفتے کن پبی جہد کننگ ءِ تو الس است جم مریک و اوفتا حکومت آ پت سلک۔ اوپارے کہ نن است اٹ الس نا خذمت ءِ کرینن، آزاد کشمیر نا الس مسلم لیگ (ن) ءِ مثالی مینڈیٹ تسنے، دُن انگا مینڈیٹ قسمت اٹ جماعت اسے ملک۔ وزیراعظم پارے کہ حکومت الس نا پت آ پورو سلے، حکومت نا کاریم نا السءِ گچین بایدے بھرم ملے۔

اوپارے کہ نن قوم انا ہر تپہ غاتا بے پرخ خذمت ءِ کینہ۔ وزیراعظم پارے کہ جمہوریت نا مطلب سگ انا مادہ تخنگ، مثبت تنقید نا مون تروئی ءِ، نن ملک اٹی افہام و تفہیم نا سیاست نا بناءِ کرینن۔ اوپارے کہ میثاق جمہوریت آ دستخط آن جمہوریت نا پوسکن آ دور انا بناء مسوسس، نن تو چارٹرڈ آف ڈیموکریسی آ پورووڑاٹ عمل کننگ اُن ولے اگہ کسس یکونیم خشت انا مسیت اس جوڑ کرسا تولے و میں نہ مانوں نا پالیسی آ عمل کے اونا نن انت کننگ کینہ، اونا ہچ ءُ درمان اس نن تون اف۔

دا لاعلاج ءُ ویل اسے۔ اوپارے کہ ننا افہام و تفہیم نا سیاست نا مثال بلوچستان ، آزاد کشمیر ، خیبرپختونخوا ، گلگت بلتستان تون اوار ہر جاگہ غا نظر بریک، نن ایلو جماعت آتا مینڈیٹ آتا شرف ءِ کرینن انتئے کہ ہندا جمہوریت ءِ ، ملک و قومک ہنداوڑ چلینگرہ داوڑکہ خاہوت آک ہم ہنداوڑ چلینگرہ۔ اوپارے کہ اللہ تعالیٰ نا شکر ءِ کہ ننا حکومت شونداری نا ایجنڈا غا عملدرآمد کننگ ءِ، آزاد کشمیر اٹی بجلی ڈٹ خلنگ نا بھلو وارخواہی اسے دا وارخواہی تیان فائدہ ہرفنگ نا گرج ءِ ۔

اوپارے کہ نن ملک اٹی بجلی نا کاختی ءِ مر کننگ کن کارخانہ خلنگ اُن، آزاد کشمیر نا بندغ آک ہم توانائی نا بشخ اٹی زرکاری کننگ کیرہ۔ وزیراعظم پارے کہ سی پیک مثالی شونداری ڈٹ اسے، اونا رداٹ کیہی ڈٹ آتیا کاریم برجاءِ، سی پیک نا جوان ءُ نتیجہ اس مون آ بریک ، سی پیک نا رداٹ مچ آ ملک اٹی روڈ و موٹروے تا جال اس شاغنگ انگ ءِ۔ اوپارے کہ اخہ در زَر داوخت جتا ڈٹ آتیا ملکی شونداری کن خڑچ کننگ انگ ءِ تاریخ اٹی اونا ہچ ءُ مثال اس ملیپک۔ اوپارے کہ آزاد کشمیر ہم سی پیک نا ڈٹ آتیا مستفید مریک۔