قومی اسمبلی نا پبلک اکاؤنٹس کمیٹی نا دیوان

وزارت امور کشمیر و گلگت بلتستان نا آڈٹ اعتراض آتیا پی اے سی نا احکامات آتا روشنی ٹی عملدرآمد نا حالیت آتا جاچ ءِ ہلنگا

قومی اسمبلی نا پبلک اکاؤنٹس کمیٹی نا دیوان 
وزارت امور کشمیر و گلگت بلتستان نا آڈٹ اعتراض آتیا پی اے سی نا احکامات آتا روشنی ٹی عملدرآمد نا حالیت آتا جاچ ءِ ہلنگا

اسلام آباد(پاکستان نیوز پوائنٹ 28دسمبر2016ء) قومی اسمبلی نا پبلک اکاؤنٹس کمیٹی نا فیصلہ غاتیا عملدرآمد کن اڈ ہلوک خصوصی کمیٹی نا دیوان چارشنبے آ پارلیمنٹ ہاؤس اٹی کمیٹی نا کنوینر رانا افضال احمد نا کماشی ٹی مس ہراٹی کمیٹی نا باسک میاں عبدالمنان تون اوار تعلقدار سرکاری ادارہ غاتا بڑزکو افسرآک ساڑی ئسر۔ دیوان اٹی وزارت امور کشمیر و گلگت بلتستان نا آڈٹ اعتراض آتیا پی اے سی نا احکامات آتا روشنی ٹی عملدرآمد نا حالیت آتا جاچ ءِ ہلنگا۔

آڈٹ کمامدارآک پی اے سی ءِ پاریر کہ 1998ء ٹی لین آف کنٹرول آ زہمی تا بحالی کن بطور ایڈوانس 18کروڑ آن زیات زر اداکننگا۔ 18سال تدینگ انگ نا باوجود 70 درسد آن زیات زر انا داوخت اسکان ایڈجسٹمنٹ مننگ کتنے۔ کمیٹی استفسار کرے کہ چارسال مست معاملہ نا جاست وپاست کن پی اے سی حکم تسوسس ولے داوخت اسکان اونا جاست و پاست ءِ انت اکن کننگ تنے۔ میاں عبدالمنان پارے کہ 18 سال تدینگ انگ نا باوجود زرانا معاملہ انت اکن طے مننگ کتو۔ آڈٹ کمامدارآک پی اے سی ءِ پاریر کہ آزاد کشمیر حکومت نا ملکیتی ڈغار غیر کانودی وڑاٹ ہلنگا ہرافتیان 76کنال ڈغار نا نرخ داوخت اسکان اد اکننگ تنے۔ کمیٹی پارے کہ ساڑی آ مارکیٹ ویلیو نا رداٹ نرخ ہلنگے و ادائیگی مفننگ نا دروشم اٹی جاگہ ءِ خورک کرفنگے۔