وزیراعظم نا خصوصی کمکار خارجہ امور طارق فاطمی کویت نا سفیر ناصر عبدالرحمان جے المطائری تون اوڑدہی ٹی ہیت وگپ

وزیراعظم نا خصوصی کمکار خارجہ امور طارق فاطمی کویت نا سفیر ناصر عبدالرحمان جے المطائری تون اوڑدہی ٹی ہیت وگپ

اسلام آباد(پاکستان نیوز پوائنٹ 27دسمبر2016ء) وزیراعظم نا خصوصی کمکار خارجہ امور طارق فاطمی پارینے کہ پاکستان و کویت مشکل نا ہر ساہت اٹی ہمیشہ اسہ ایلو تون تفینو و ہڑتوم آ ملک آک علاقائی و جہانی ویل آتا بارواٹی اسہ وڑنا خیال تخرہ۔ سی پیک آن کویتی زرکار آتے کن پاکستان اٹی بھلو اقتصادی وارخواہی دسیتاب ءِ۔ دفترخارجہ نا ترجمان نا رداٹ دا ہیت آتے او پاکستان اٹی کویت نا پوسکن آ سفیر ناصر عبدالرحمان جے المطائری تون ہیت وگپ کرسا پارے ہراک تدوک آ دے دفترخارجہ اٹی اوڑتون خیر سگالی اوڑدہی کریر۔

خصوصی کمکار پوسکن آ سفیر آتا خیرمقدم ءِ کرے۔ سفیر کویت نا وزیر خارجہ شیخ صباح الخالد الصباح نا کنڈآن خصوصی کمکار ءِ نیک است خواہی تا کلہو اس رسیفے۔ اوپارے کہ پاکستان و کویت نا نیام اٹ خوشگوار تعلقداریک ءُ وخت اس کہ پاکستان مشکل نا ہرساہت اٹی ہمیشہ کویت تون پورو کمک کرینے۔ اودا عزم انا درشانی ءِ کریر کہ او ہڑتوم آ ملک آتا نیام اٹ ساڑی دوستانہ و خڑکی تعلقداری تے پین سوگو کننگ کن کوشست آتے برجاتخرہ۔

داوخت آ طارق فاطمی پارے کہ پاکستان و کویت مشکل نا ہرساہت اٹی ہمیشہ اسہ ایلو تون تفینو۔ چین پاکستان اقتصادی راہداری نا بناء آن کویتی زرکارآتے کن پاکستان اٹی بھلو اقتصادی وارخواہی اس ودی مسنے۔ طارق فاطمی پارے کہ کویتی زرکارآتے حکومت پاکستان نا کنڈآن تروک آ کاروبار دوست چاگڑد آن فائدہ ہرفنگ کن بجلی نا بشخ اٹی زرکاری کننگ کیرہ۔ کویت نا سفیر امن و سلامتی ءِ گچین جوڑ کننگ خاص کر دہشت گردی نا برخلاف پاکستان نا سرسہبی تا ستاءِ کرے۔

پاکستان اٹی جاری اسیجائی ڈٹ آتا حوالہ ترسا کویت نا سفیر دا پت انا درشانی ءِ کرے کہ پاکستان و کویت نا تعلقداریک مثبت سمت اٹی ودسا کارہ۔ اوپارے کہ پاکستان نا مسلم ملک آتا نیام اٹ برادرانہ تعلقداری تے سوگوکننگ و ڈیہہ ٹی امن و سوگوی نا اڈتننگ اٹی اہم کڑد اسے۔