کوئٹہ (پاکستان پوائنٹ نیوز۔25 جولائی۔2016) وزیراعلیٰ بلوچستان نواب ثناء اللہ خان زہری پارینے کہ گوادر انڈسٹریل زون ءِ چین نا تائی جن انڈسٹریل زون وڑاٹ شون تننگے تانکہ علاقہ ٹی صنعت کاری نا عمل ءِ مون آدننگے، وخت اس کہ گوادر انڈسٹریل اسٹیٹ تینا دائرہ کار اٹی بروک آ ضلع تربت و پنجگور اٹی ہم صنعتی شون کن گام گیج کے۔ ننے پاک چین اقتصادی راہداری نا ڈٹ انا دروشم اٹی بلوچستان و الس نا شون و شونہالی نا ہراعظیم موقع ملانے اوڑآن پبی فائدہ ہرفنگک۔
داہیت ءِ او گوادر انڈسٹریل اسٹیٹ نا معاملہ غاتا بابت جاچ دیوان آن تران کرسا کرے۔ دیوان اٹی سینئر ممبر بورڈ آف ریونیو قمر مسعود، سیکرٹری خزانہ اکبر حسین درانی، سیکرٹری صنعت و واپار نورمحمد جوگیزئی، ڈپٹی کمشنر گوادر طفیل بلوچ و ایلو بڑزکو کمامدارآک ہم شرکت کریر، وخت اس کہ سیکرٹری صنعت و واپار نورمحمد جوگیزئی نا کنڈآن دیوان ءِ بریفنگ ترسا پارے کہ جیڈا ءِ 2009 ء ٹی اتھارٹی نا درجہ تننگا، 3ہزار ایکڑ ڈغار آ محیط انڈسٹریل اسٹیٹ اٹی چنکو، درمیانی صنعت و واپاری مسخت آتے کن 2269پلاٹ ءُ، داوخت اسکان 419.5ملین روپئی انڈسٹریل اسٹیٹ اٹی بنداوی ڈھانچہ نا فراوانی نا ڈٹ آتیا خڑچ کننگانو، دیوان ءِ پاننگاکہ اسٹیٹ نا آخبت نا گرج آک ہرافتے ٹی دیر، بجلی و گیس اوارے ءِ پورو کننگ کن ایل این جی ٹرمینل ، تہو و دے و کولا آن بجلی نا پیداوار و دیر صاف کننگ نا پلانٹس آتا خلنگ نا ڈٹ تیار کننگانو ہرافتا پی سی ون و فزیبلٹی رپورٹ گوادر نا ماسٹر پلان اٹی اوار کننگ کن بنجائی حکومت ءِ گدریفنگانو، اوڑتون اوار اوار انڈسٹریل اسٹیٹ اٹی پین 500 ایکڑڈغار نا ودکی نا ڈٹ ہم منظوری کن پلاننگ کمیشن آ گدریفنگانے ہراڑآ خرچ انا تخمینہ 1668ملین روپئی ءِ۔
داوخت آ وزیراعلیٰ پارے کہ او زوت گوادر انڈسٹریل اسٹیٹ نا دورہ ءِ کرسا غٹ تعلقدار امور و ویل آتا جاچ ءِ ہلیک تانکہ اوفتے دیر پا بنداو تیا ایسر کرسا گوادر اٹی صنعت کاری نا بناء نا بنداو ءِ تخنگ مرے۔ داوخت آ وزیراعلیٰ گوادر انڈسٹریل اسٹیٹ اٹی صنعتی و واپاری پلاٹ آتا الاٹمنٹ آ خلوک پابندی ءِ مر کننگ نا فیصلہ کرسا پارت کرے کہ داپلاٹ آتا بہاء کننگ نا عمل ءِ صاف و شفاف جوڑ کننگ کن اوفتا کل انا مون آ نیلامی ءِ کننگے تانکہ زیات آن زیات بندغ نیلامی ٹی بشخ ہلیر و پلاٹ آتا گچین قیمت ملنگ کے، وزیراعلیٰ پارت کرے کہ گوادر انڈسٹریل اسٹیٹ ءِ سورڈ ڈیم نا کمک اٹ دیر انا فراوانی ءِ ممکن جوڑ کننگے وخت اس کہ ڈی سیلینیشن پلانٹ نا کمک اٹ ہم اسٹیٹ نا گرج انا رداٹ دیر انا فراوانی ءِ باوری جوڑ کننگے۔
وزیراعلیٰ جیڈا نا انتظامیہ نا کنڈآن انڈسٹریل اسٹیٹ نا ودکی کن پین ڈغار نا فراوانی نا صلاح آن اتفاق کرسا بورڈ آف ریونیو و ڈپٹی کمشنر گوادر ءِ دابابت آن گام گیج آتا جاچ ءِ ہلنگ نا پارت کرے وخت اس کہ اوداہم پارت کرے کہ جیڈا ءِ اسہ وت واجہ و خو دانحصار ادارہ نا وڑاٹ شون ترسا حکومت آ انحصار کم آن کم کننگے و ادارہ ءِ دوئی مروک آ کٹیا آن انڈسٹریل اسٹیٹ نا شون، بنداوی ڈھانچہ نا فراوانی و ودیکی ڈٹ آتیا عملدرآمد کننگے، دارداٹ صوبائی حکومت ہم کمکاری کیک، واہم ادارہ ءِ تینا نت تیا تینٹ سلوئی مریک، سی پیک نا تناظر اٹی جیڈا نا اہمیت و زمہ واری تیٹی پین ودکی مسنے ہرافتے پورو کننگ کن سخت بنداؤ تیا ڈٹ بندی کننگ نا گرج ءِ۔
