اسلام آباد (پاکستان پوائنٹ نیوز۔25 جولائی۔2016) مزن وزیر محمد نواز شریف ءَ گوشتگ کہ ما کابل ءَ بوتگیں ناشرکاریءِ چوشیں اپسوزیں واکیہ ءِ پد ءَ اوگانستان ءَ گوں ھمگام ءَ اوشتاتگ آں، پاکستان ناشرکاری ءِ ھلاپ ءَ جنگ ءَ اوگانستان ءِ گوما وتی کمک ءَ جاڑی دارگ ءَ دلیکیم اِنت۔ مزن وزیر ءَ اوگان صدر اشرف غنی ءَ را ٹیلی فون کُت ءُُ گوشت کہ پاکستان ءِ حکومت ءُُ اُلس 23جولائی ءَ کابل ءَ بوتگیں ناشرکاری ءِ اپسوزی وئیل ءِ پد ءَ اوگانستان ءِ گوما ھمگام ءَ اوشتاتگ۔
دو شمبے ءِ روچ ءَ مزن وزیر کارگس ءِ نیمگ ءَ چہ جاڑی بوتگیں بیانے ءِ رد ءَ ناشرکاری ءِ چوشیں سِنگدلیں کاروائی ءِ تہ ءَ بنی آدم آنی بے دردی ءَ کوش ءَ را سک باز ایراد گپتگ مزن وزیر ءَ اے واکیہ ءِ تہ ءَ بیران بوتگیں ءُُ ٹپیگیں مردم آں گوں دلپدردی ءِ درشان کُتگ ءُُ گوشتگ کہ ٹپیگ زوت دُراھ بات اَنت۔ ناشرکاری ءَ را دوئیں ملک آنی دژمن گوشان ءَ مزن وزیر ءَ گوشت کہ پاکستان ناشرکاری ءِ ھلاپ ءَ جنگ ءَ اوگانستان ءِ گوما کمک ءَ جاڑی دارگ ءَ دلیکیم اِنت۔
اوگانستان ءِ صدر ءَ اے گرانیں ساھت ءَ اوگان حکومت ءُُ اُلس ءِ گوما یکجائی ءِ درشان کنان ءَ گوشت کہ ما مزن وزیر محمد نواز شریف ءِ شُگر ءَ گراں۔ اوگان صدر ءَ گوشت کہ دوئیں ملک مُدام ناشرکاری ءِ آماچ اَنت۔آئی ءَ براتیں ملک ءِ بستار ءَ اوگانستان ءِ اُلس ءَ گوں ڈُکھ ءُُ دِلپدردری ءِ درشان کنگ ءَ را ساڑات۔ اوگانستان ءِ صدر ءَ دِلیکیمی دات کہ ناشرکاری ءِ ھلاپ ءَ جنگ ءَ ما یکمشت آں۔
