وزیراعظم محمد نواز شریف نا اوغان صدر اشرف غنی ءِ ٹیلی فون ، دہشت گرد آتا بہیمانہ کارروائی و انسانی جان تا بے رحمانہ خون نا ترندی اٹ مذمت

وزیراعظم محمد نواز شریف نا اوغان صدر اشرف غنی ءِ ٹیلی فون ، دہشت گرد آتا بہیمانہ کارروائی و انسانی جان تا بے رحمانہ خون نا ترندی اٹ مذمت

اسلام آباد (پاکستان پوائنٹ نیوز۔25 جولائی۔2016) وزیراعظم محمد نواز شریف پارینے کہ نن کابل اٹی مروک آ دہشت گردجلہو نا افسوزناک سانحہ غا اوغانستان تون ہم کوپہ سلوک اُن، پاکستان دہشت گردی نا برخلاف جنگ اٹی اوغانستان تون تینا کمک ءِ برجاء تخنگ کن پرعزم ءِ۔ وزیراعظم اوغان صدر اشرف غنی ءِ ٹیلی فون کرے وپارے کہ پاکستان نا حکومت و الس 23جولائی آ کابل اٹی مروک آ دہشت گرد جلہو نا افسوز ناک سانحہ غا اوغانستان نا شانہ بشانہ سلوک ءُ۔

دوشنبے آ وزیراعظم آفس آن برجاء کروک بیان نا رداٹ دہشت گرد آتا بہیمانہ کارروائی و انسانی جان تا بے رحمانہ خون نا ترندی اٹ مذمت ءِ کرسا وزیراعظم دا گھناؤجلہو اٹی تپاخت کروک آتا وارث آتون ہمدردی نا درشانی ءِ کرے و ٹھپی مروک آتا زوت جان جوڑی کن دعا کرے۔ دہشت گردآتے ہڑتوم آ ملک آتا اسیجا ء دژمن گوندسا وزیراعظم پارے کہ پاکستان دہشت گردی نا برخلاف جنگ اٹی اوغانستان تون تینا کمک ءِ برجاء تخنگ کن پرعزم ءِ۔

اوغان صدر اشرف غنی دامشکل وخت آ اوغان حکومت الس تون یکجہتی نا درشانی کننگ آ وزیراعظم محمد نواز شریف نا منت واری ءِ ادا کرے۔ اوغان صدر پارے کہ ہڑتوم آ ملک آتے دہشت گرد آتا پدریسہ جلہو آتا مون تروکی ءِ۔ اوبرادر ملک انا حیثیت آن اوغانستان نا الس کن ڈکھ و افسوز نا درشانی کننگ نا ستاءِ کرے۔ اوغان صدر باوری ترفے کہ دہشت گردی نا برخلاف جنگ اٹی ہم متحداُن۔