کوئٹہ(پاکستان نیوز پوائنٹ 19دسمبر2016ء) گورنر بلوچستان محمدخان اچکزئی پارینے کہ دیر انا ویل نہ صرف ملک و صوبہ نا بلکن دا مچ آ دنیا نا سنگین انگا ویل جوڑ مسنے، کشاری و آبی چاہندار آتے ازسرنو دیر انا ویل آ ڈٹ بندی کروئی مرے تانکہ آخبت اٹی دا ویل انا پائیدار ایسر اس پیش تمنگ کے، بنجائی حکومت نا توبہ اچکزئی و توبہ کاکڑی ٹی 300 ڈیلے ایکشن ڈیم جوڑ کننگ نا ڈٹ بندی ءِ اومیت ءِ ہنداوڑڈغار نا تہٹی دیر انا کوڑی ءِ نن بچفنگ کینہ، ژوب و لورالائی ڈیلے ایکشن ڈیم تیٹی مردہ کاریزآک دُوارہ زندہ مسنو۔
داخیال آتا درشانی ءِ او آئی یو سی این، گورنمنٹ آف بلوچستان شونداری فاؤنڈیشن نا کنڈآن ورلڈ واٹرڈے نا مناسبت آن اڈہلوک آ اِرادے ئی سیمینار آن تران کرسا گورنر بلوچستان محمد خان اچکزئی پارے کہ قدرتی وسیلہ غاتابے دریغ کاریم اٹ اتنگ نا سوب بلوچستان اٹی دیر انا ویل سنگین مسنے ۔ اوپارے کہ کشاری و آبی چاہندار آتے دُوارہ دیر انا ویل آ ڈٹ بندی و پٹ وپول کروئی مریک تانکہ صوبہ ٹی سوزی و میوہ غاتا گرج آتے پورو کننگ مرے۔
گورنر بلوچستان پارے کہ ہندن ءُ سوزی و میوہ درستی راستی کرفیر ہرافتے دیر انا کم گرج تمک۔ گورنر نا پاننگ ئس کہ انگریز دور حکومت اٹی بلوچستان نا مش تیا سبزہ و جنگلات آتاخاص خیال ءِ تخنگاکہ ولے اینو حالیت آک اونا برعکس ءُ۔ حکومت توبہ اچکزئی و توبہ کاکڑی ٹی 300 ڈیلے ایکشن ڈیم جوڑ کننگ نا پلان جوڑ کرینے ہراڑآن اومیت ءِ کہ ڈغار نا تہٹی دیر انا کوڑی ٹی ودکی ممکن ءِ انتئے کہ ژوب و لورالائی ڈیلے ایکشن ڈیم تا جوڑ مننگ آن گڈ ہموجاگہ نا مردہ کاریزآک دُوارہ زندہ مسر۔
اوپارے کہ یورپی یونین و یو ایس اے بلوچستان اٹی دیر انا سنگین ویل اکن نن تون تفر تانکہ دا سنگین ویلءِ ایسر کننگ مرے۔ سیمینار آن امجد رشید، شیر یار ، محمود تاج، فیض محمد کاکڑ و ایلو چاہندارآک تران کرسا پاریر کہ اینو نا سیمینار نا مسخت کوئٹہ تون اوار مچ آ بلوچستان اٹی ڈغار نا تہٹی دیر انا کوڑی ءِ بچفنگ کن پٹ وپول کروئی مریک داڑکن المی ءِ کہ صوبہ ٹی ڈیلے ایکشن ڈیم جوڑ کننگے تانکہ پِرتا دیر ءِ تورسا ڈغار نا تہٹی دیر انا کوڑی ءِ بچفنگ مرے۔
اوپارے کہ داوخت آ کوئٹہ تون اوار صوبہ نا کیہی علاقہ غاتیٹی دیر انا گہرائی ہزار فٹ آن پانزدہ سد فٹ اسکان سرمسنے اودے توننگ ننا غٹ انا زمواری ءِ۔ چاہندار آک پاریر کہ داکان مست سال اٹی 60 دے پِر مریک ہرا موسمی بدلی تا سوب داسہ صرف 48 دے سلیسنے ہنداوڑ مہالو پِر مچ آ ہفتہ کرار کرار آ مسکہ ہراڑآن ڈغار نا تہٹی دیر اناکوڑی وداکہ۔ سیمینار سے شنبے آ ہم برجاسلک۔ سیمینار نا ایسری آ ڈغار نا تہٹی دیر انا کوڑی نا بابت ہراسفارش آک مرتب مریرہ حکومت بلوچستان و تعلقدار محکمہ غاتا حوالہ کننگک تانکہ کوئٹہ ٹی دیر انا کاختی و ڈغار نا تہٹی دیر اناتموک آ حالیت آتیا مون ءِ توننگ مرے۔
