اسلام آباد(پاکستان نیوز پوائنٹ 16دسمبر2016ء) ھواریں مفادات کونسل ءَ آؤکیں سال 15مارچ ءَ راجی مردم شماری کنگءِ سرا تپاک کرتگ انت چوشکہ اے ہم تپاک بوتگ کہ خانہ شماری ءُُ مردم شماری ءِ کار یک جا کنگ بیت انت۔ مزن وزیر محمد نواز شریف ءِ پاگواجہی ھواریں مفادات کونسل ءِ مراگش جمعہءَ مزن گِس ءَ بوتگ آئی ءَ تپاک کرت انت کہ مردم شماری دو وھد ءَ بیت ءُُ ہر وھد درستیں صوبہ ءَ یک وھد ءَ بندات کنگ بیت۔
مراگش ءَ تپاک کرت انت کہ مردم شماری صوبائی حکومت آنی شریں رابطہءَ کنگ بہ بیت۔ سی سی آئی ءَ عمل کننگی مسئلہ طے کنگ ءِ ھاتر ءَ سیکرٹری پاکستان بیورو شماریات ءُُ چار چیف سیکرٹری آنی ھواری ءَ یک کمیٹی جوڑ دئیگ ءِ ہم پیسلہ کرت انت۔ مزن گِس ءِ نیمگءَ برجاہ بیان ءِ ردا ھواریں مفاد کونسل ءَ نیشنل سیکورٹی فنڈ ءِ سروکی ءَ ہم پکر کرت انت ءُُ اے معاملہ نیشنل فنانس کمیشن ءِ ھوالہ کرت انت کہ آ پیسلہ ءِ ھاتر ءَ مجاز فورم انت۔
کونسل ءَ راجی جنگلات پالیسی ءِ اصولی منظوری داتگ ءُُ وزیر موسمیاتی بدلی ءَ پنت ءُُ شون کرتگ کہ آ صوبائی حکومت آں گوں یکجا کار بہ کنت تنکہ اے گپ ءَ یقینی جوڑ کرت بہ کن انت صوبائی وت واجہی ءِ ھوالہ ءَ تجویز نہ بوتگ۔ بنجاہی جنگلات پالیسی ءَ بنجاہی حکومت صوبائی حکومت آں صوبہ آں وتی پالیسی فریم ورک ءِ روژنائی ءَ ءُُ میاں استمانی معاہدہ ءِ سرا پیروی کنگ ءَ تکنیکی ءُُ مالیاتی کمک دات کن انت۔
ھواریں مفادات کونسل ءَ حکومت پنجاب ءَ ھاس ہائیڈل پائدگ دئیگ ءِ توثیق کرتگ۔ اے گپ ءِ سرا تپاک کرت انت کہ 38.12ارب کلدار تاں دسمبر2016حکومت پنجاب ءَ یک سال ءِ وھد ءَ ” پر امیسری نوٹ“ ءِ برجاہیءِ ذریعہ ءَ طے کنگ بیت چوشکہ دِگہ 44.59ارب کلدار سی سی آئی /نیپرا ءِ نیمگءَ نرخ ءِ تعین ءَ پد سے بروبر قسط آں ادا کنگ بیت۔ مراگش ءَ بنجاہی وزیر سمندر پار پاکستانیز پیر سید صدر الدین شاہ راشدی، بنجاہی وزیر سیفران لیفٹیننٹ جنرل (ر) عبدالقادر بلوچ ، بنجاہی وزیر مذہبی امور سردار محمد یوسف ءَ بہر زرت انت۔ سر وزیر پنجاب شہباز شریف ، سر وزیر سندھ سید مراد علی شاہ، سر وزیر خیبر پختونخوا پرویز خٹک، سر وزیر بلوچستان ثناء اللہ خان زہری ءَ ہم مراگش ءَ بہر زرت انت۔
