اسلام آباد(پاکستان نیوز پوائنٹ 16دسمبر2016ء) بنجائی وزیر ڈٹ بندی ، شونداری و اصلاحات پروفیسر احسن اقبال پارینے کہ سانحہ آرمی پبلک اسکول پشاور ملک انا تاریخ نا سیاہ انگا باب ءِ ہرا مدت آتے اٹ ہم است آن دننگ مفک، اِراسال نا وخت گدرینگ انگ نا باوجود اینو ہم ہر پاکستانی نا است داوقعہ غا ڈکھیاءِ۔ داخیال آتا درشانی ءِ او جمعہ آ سانحہ آرمی پبلک اسکول نا ارٹ میکو برسی نا وخت تینا کلہو اٹی کرے۔
اوپارے کہ سانحہ پشاور آن دا حقیقت صفا مون آ بس کہ وطن و انسانیت نا دشمنک ننے تعلیم آن مر کرسا ننا آخبت ءِ تہار کننگ خوارہ۔ اوپارے کہ دہشت گرد آک ہمیشہ پاکستان ءِ نزور کننگ کن تعلیمی ادارہ و ہسپتال آتے نشانہ جوڑ کریر۔ اوپارے کہ دہشت گرد عنصر آک قوم انا حوصلہ ءِ پست کننگ اٹی بے سہب مسنو۔ اے پی ایس آ جلہو مچ آ قوم ءِ دہشت گردی نا برخلاف یکجا کرے۔ اومستی پارے کہ قوم ، حکومت و عسکری سروک آتا سیوت نا بدولت دہشت گرد آتا برخلاف آپریشن سرسہبی اٹ ہمکنار مس، مچ آ پاکستانی قوم زہمی خاہوت آتا ڈکھ و دڑداٹی بریبر نا شریک ءُ۔ اودعا کرے کہ اللہ سانحہ اے پی ایس پشاور نا زہمی تے صبر و جمیل عطاء فرمائفے۔
