اسلام آباد(پاکستان نیوز پوائنٹ 15دسمبر2016ء) دفترخارجہ نا ترجمان اسہ وار ولدا صفا کرینے کہ پاکستان اٹی داعش نا ہچ ءُ منظم اس ساڑی اف، پاکستان بھارت تون کشمیر تون اوار غٹ ایسر نا چاری معاملہ غاتیا پرامن مذاکرات نا کمک اٹ ایسر کننگ نا یخین تخک، بھارت نا منفی رویہ مذاکرات نا کسر اٹی بنداوی اڑاند ءِ۔ پاکستان کشمیر نا جھیڑہ کشمیری الس نا است خواہی و اقوام متحدہ نا سلامتی کونسل نا قرارداد آتا کمک اٹ آزادانہ و منصفانہ رائے شماری نا کمک اٹ ایسر کننگ نا اصولی موقف آ سلوک ءِ۔
داخیال آتا درشانی ءِ دفترخارجہ نا ترجمان محمد نفیس ذکریا پنچ شنبے آ ہفتہ وار پریس بریفنگ نا وخت صحافی تا جتا سوج آتا ورندی ءِ ترسا کرے۔ ترجمان پاکستان ءِ بشخ وپانٹ کننگ نا بابت بھارتی وزیر خارجہ راج ناتھ نا بیان نا سخت مذمت ءِ کرسا اودے مضحکہ خیز گوندا و پارے کہ راج ناتھ نا بیان پاکستان اٹی بھارتی انٹیلی جنس نا کنڈآن تخریبی سرجزو تہہ نا معاملہ غاتیٹی نیام تمنگ نا صفا اعتراف و نئی دہلی نا کنڈآن ڈیہہ ٹی نزور ی تالان کننگ نا بابت پاکستان نا موقف نا تائید ءِ۔
بھارتی وزیر داخلہ نا بیان اقوام متحدہ نا چارٹر و جہانی کانود نا سراسر خلاف ورزی ءِ۔ اوپارے کہ پاکستان بھارت تون کشمیر تون اوار غٹ ایسر نا چاری ویل آک پرامن مذاکرات نا کمک اٹ ایسر کننگ آ یخین تخک۔ پاکستان ہمیشہ مذاکرات کن سازگار چاگڑد ودی کننگ نا کوشست کرے ولے بھارت وخت اس ہم ننا پیش کش نا مثبت ورندی ءِ تتنے۔ اوپارے کہ بھارت نا منفی رویہ مذاکرات نا کسر اٹی بنداوی اڑاند اسے۔
اوپارے کہ جہانی برادری ہم پاکستان نا داموقف آن جوانی اٹ معلومدار ءِ۔ بھارت اٹی اقلیت آتیا بیدادی نا بابت اسہ سوج اسے نا ورندی ءِ ترسا ترجمان پارے کہ جہانی برادری ءِ بھارت اٹی اقلیت آتون ناروا سلوک آ بے کچ گڑتی ءِ۔ اوپارے کہ گدرینگوک آ منہ تو انا وخت بھارت اٹی 200 آن زیات چرچ آتے خاخر تننگا وخت اس کہ ساڑی ہی ٹی مقبوضہ کشمیر اٹی مسلمان تے عید میلا د النبی نا وخت آ سیرت کانفرنس نا اڈتننگ آن توننگا۔
داکان بیدس نماز جمعہ نا مچی تیا مست آن پابندی خلوک ءِ۔ ترجمان پارے کہ جہانی برادری بھارت اٹی اقلیت آتا بنداوی و مذہبی آجوئی نا حق انا خلاف ورزی تیا شدید گڑتی نادرشانی ءِ کرینے۔ ترجمان پارے کہ پاکستان دہشت گردی نا چٹفنگ کن سخت گام گیج کرینے، امریکہ۔ یورپی یونین تون اوار جہانی برادری دہشت گردی نا برخلاف جنگ اٹی پاکستان نا قربانی و سرسہبی تا اعتراف ءِ کرینے۔
اوپارے کہ پاکستان اٹی داعش نا ہچ ءُ منظم اس ساڑی اف، حقانی ، القاعدہ تون اوار ایلو دہشت گرد رڑتا غٹ راہشونک اوغانستان اٹی خلنگانو۔ اوپارے کہ پاکستان دہشت گردی نا خلیس آتیان جوانی اٹ معلومدار ءِ دا چرجوئی ٹی اوغانستان و امریکہ نا کنڈآن کمکاری نا گرج ءِ۔ ترجمان پارے کہ پاکستان اوغانستان اٹی امن کن پرعزم ءِ۔ پاکستان اوغانستان اٹی امن نا اڈتننگ کن بے کچ مخلصانہ کوشست آتا بناءِ کرینے ولے ملاعمر و اوکان گڈ ملااختر منصور نا مرک آن غٹ عمل زہمی مس۔ اوغانستان اٹی امن ڈیہہ ٹی امن و سوگوی کن المی ءِ۔
