بھارتی منفی رویہ نا سوب پاکستان تون تعلقداری تے گچین جوڑ کننگ نا کیہی سنہری وارخواہی تے گوائفینے، ترجمان دفتر خارجہ

بھارتی منفی رویہ نا سوب پاکستان تون تعلقداری تے گچین جوڑ کننگ نا کیہی سنہری وارخواہی تے گوائفینے، ترجمان دفتر خارجہ

اسلام آباد(پاکستان نیوز پوائنٹ 15دسمبر2016ء) دفترخارجہ نا ترجمان نفیس ذکریا پارینے کہ بھارت تینا منفی رویہ غاتا سوب پاکستان تون تعلقداری تے گچین جوڑ کننگ نا کیہی سنہری وارخواہی تے گوائفینے۔ ریڈیو پاکستان ءِ خصوصی انٹرویو ٹی اوپارے کہ بھارت تون تعلقداری تیٹی گچینی نا ہمووخت اسکان اومیت اف ہراوخت اسکان او تینا منفی رویہ غاتے ہلیپک و کودک کشمیری تیا بیدادی ءِ بند کپک، اوداہیت آ ہم است ہسونی نا درشانی ءِ کرے کہ بھارت تینا منفی رویہ غاتا درشانی ءِ سارک کانفرنس و ساڑی ہی ٹی مروک آ برکس و ہارٹ آف ایشیاکانفرنس آتے لتاڑسا ہم کرینے۔

بھارت تینا بیان آتیٹی کشمیری تا جہد نا تحریک ءِ دہشت گردی نا پن ایتک ہراکہ سراسر غلط ءِ دا کودک کشمیری تا آجوئی نا جہد ءِ ہراڑکن او پدریسہ ہفت دہائی تیان جہد کننگ ءُ، اسہ ملک اس ہم بھارت نا دابیان آتیان متفق اف، کنٹرول لین آ اشتعال انگیز کارروائی کرسا بھارت جہانی برادری نا توجوہ ءِ کشمیر نا ویل آن اسہ کنڈ کننگ خوائک ، بھارت تینا داکوشست اٹی وخت اس ہم سرسہب مفک، پاکستان ہر جہانی پلیٹ فارم آ کشمیرنا ویل ءِ پبی وڑاٹ ہرفینے و دا ویل آہمووخت اسکان ہیت کرسا کیک ہراوخت اسکان دا ویل ایسر مفک۔

اوپارے کہ پاکستان نا کنڈآن پبی سفارت کاری نا سوب اقوام متحدہ ، او آئی سی و انسانی حق انا جہانی ادارہ غاک مقبوضہ کشمیر اٹی انسانی حق انا بھلو کچ اسے آ خلاف ورزی تیا گڑتی نا درشانی ءِ کریر و ہیومن رائٹس کمیشن و او آئی آن دا معاملہ نا غیر جانبدارانہ جاست وپاست نا خواست کرینے، او دے مراف ہراتم بھارت ءِ جہانی برادری ءِ دا معاملہ نا جاست وپاست نا موکل تروئی تمک و کشمیری تے بھارت نا بیدادی آن نجات دوئی مریک و اوفتے آجوئی نا نعمت عطامریک۔ اوپارے کہ چھٹی ٹی امن نا اڈتننگ کن کشمیرنا ویل انا ایسری بے حد المی ءِ۔