اسلام آباد(پاکستان نیوز پوائنٹ 9دسمبر2016ء) امریکی سینیٹ نا سلہہ بند فوج کمیٹی نا چیئرمین سینیٹر جان میکین پارینے کہ امریکہ دہشت گردی نا برخلاف پاکستان نا کوشست آتیٹی کمکاری ءِ برجاتخک۔ داہیت ءِ او وزیراعظم نا خصوصی کمکار خارجہ امور طارق فاطمی تون ہیت وگپ کرسا پارے۔ دفترخارجہ نا ترجمان نا رداٹ طارق فاطمی تدوک آ دے واشنگٹن اٹی سینیٹر جان میکین تون اوڑدہی کرے و ہڑتوم آ کنڈآتا تعلقداری و علاقائی سلامتی نا معاملہ غاتیا درشانِ خیال کریر۔
اوڑدہی نا وخت کنٹرول لین آ بے چیٹ حالیت و پاک اوغان تعلقداری تیا ہم سجفنگا۔ خصوصی کمکار جان میکین ءِ پاک فوج انا قطبی وزیرستان اٹی دہشت گردآتا برخلاف سرسہب فوجی آپریشن آن ہم معلومدار کرے۔ سینیٹر جان میکین پاکستان نا دہشت گردی نا چٹفنگ کن کوشست آتا ستاءِ کرے۔ اوپارے کہ امریکہ دہشت گردی نا برخلاف پاکستان نا کوشست آتیٹی کمکاری ءِ برجاتخک۔
ترجمان نا رداٹ اوڑدہی نا وخت پاک اوغان تعلقداری و ایل او سی و ورکنگ باؤنڈری آ ودوک آ بے چیٹی تتون اوار علاقائی حالیت آتے ہم شرہ ٹی اتنگا۔ سینیٹر جان میکین فوجی کمانڈ اٹی سرسہب ردوبدل آ پاکستان ءِ مبارکبادی تس و داعزم انا اعادہ ءِ کرے کہ امریکہ ڈیہہ ٹی پائیدار امن و سوگوی کن پاکستان تون کمکاری ءِ برجاتخک۔ خصوصی کمکار جان میکین ءِ بروک آ سال پاکستان نا دورہ نا سلہ ہم خلک۔ داکان بیدس طارق فاطمی واشنگٹن اٹی امریکی سینیٹ نا سلہہ بند فوج کمیٹی نا رینکنگ باسک ایلیٹ اینجل تون ہم اوڑدہی کرے۔
