تحریک انصاف دروغ تڑنگ اٹی ماہر، عمران خان نا تینا بیان آتیٹی تضاد ارے، دانیال عزیز

تحریک انصاف دروغ تڑنگ اٹی ماہر، عمران خان نا تینا بیان آتیٹی تضاد ارے، دانیال عزیز

اسلام آباد(پاکستان نیوز پوائنٹ 7دسمبر2016ء) مسلم لیگ (ن) نا راہشون دانیال عزیز پارینے کہ تحریک انصاف دروغ آ دروغ تڑنگ اٹی ماہر ءِ ولے دروغ انا دوبہ غاتا شاہدی عدالت ءِ فراوان کننگپسہ، عمران خان مہالو ایل این جی ، نندی پور و اورنج لائن ڈٹ آتیٹی کرپشن نا دوبہ غاتے خلککہ، داسہ او دوبہ غاک ہرانگ ہنار۔ اوپارے کہ ہراوڑ وزیراعظم آ دروغ نا دوبہ غاک ثابت مننگ کتوس، ہنداوڑ داسہ دا دوبہ غاک ہم ثابت مننگ کپسہ۔

پانامالیکس کیس انا سماعت اٹی وقفہ نا وخت آ سپریم کورٹ نا پیشن میڈیا تون ہیت وگپ کرسااوپارے کہ اینو عدالت اٹی پاننگاکہ 1997ء ٹی وزیراعظم آ اسہ کیس اس چلینگا ہراٹی او تینا کاروباری زمواری تیان دستبردار مرسا غٹ اختیار آتے بشخسا خاہوت نا ایلو بندغ آتا حوالہ کرے تو داسہ اودے ہمہ دوبہ دار پاننگ مریک۔ اوپارے کہ مریم نواز آ ہراہرا دوبہ غاک لگسا کریر، اینو او غٹ دوبہ غاتے دروغ ثابت کننگ کن مریم نواز نا بننگ، ٹیکس گوشوارے ، کٹیا نا ذرائع تون اوار غٹ شاہدی تے پیش کننگا و ثابت کننگاکہ مریم نواز وزیراعظم نا زیر کفالت اف۔