کوئٹہ (پاکستان پوائنٹ نیوز۔22 جولائی۔2016) اسپیکر صوبائی اسمبلی راحیلہ حمید خان درانی پارینے کہ بلوچستان رقبہ نا لحاظ آن ملک انا غٹ آن بھلا صوبہ ءِ و قدرتی وسیلہ غاتیان مالامال ءِ د اوسیلہ غاتے کاریم اٹ ہتنگ کن ساڑی آ صوبائی حکومت ٹھوس گام گیج کننگ ءِ۔ صوبہ نا مر مر انگا علاقہ غاتے ٹی بنداوی آسراتی تے باوری جوڑ کننگ کن غٹ تر وسیلہ غاتے کاریم اٹ ہتنگ انگ ءِ۔
ورناک ملک انا میرات آک ءُ ننے اوفتا گچین آخبت کن غیر معمولی گام گیج کروئی مریک۔ داخیال آتا درشانی ءِ او پنجاب نا کیہی یورنیوسٹی تا طالب علم آتا ڈل ہرا یوتھ موبلائزیشن کمپنی تا رداٹ بلوچستان نا مطالعاتی دورہ غاٹی ءُ تون اسمبلی نا دورہ نا وخت آ تران کرسا کرے۔ اوپارے کہ ورناطالب علم آک تینا تینا صوبہ غاتا سفیر مریرہ اوفتے بین الصوبائی مطالعاتی پروگرام نا رداٹ صوبہ غاتا دورہ ءِ کرفوئی مرے تانکہ او صوبہ غاتے ٹی رہینگوک آتا روایت ، دودوربیدہ و وڑوڈول آتیان بابت اوفتے جان کاری ملنگ کے اوفتا تہہ ٹی اتحاد نا جوزہ ودی مننگ کے و اوفتے ملک انا شون و شونہالی نا عمل اٹی گچین وڑاٹ متحرک کننگ مرے۔
ننے یکجا مرسا ملک انا شون کن کاریم کروئی مریک۔ او چائنا نا مثالی شون نا بارواٹی طالب علم آتے پارسا پارے کہ چین دنیا ٹی بڑزکوتعلیم ءِ مون آ درسا دا ہند ءِ دوئی کرینے و اونا شون نا مثل آتے مچ آ دنیا ٹی تننگک۔ او طالب علم آتیا زورشاغسا پارے کہ او ایمانداری ءِ تینا شعار جوڑ کیر و بڑزکو تعلیم دوئی کرسا ملک انا شون اٹی تینا کلیدی کڑد ءِ ادا کیر۔
