راولپنڈی(پاکستان نیوز پوائنٹ 29نومبر2016ء) پوسکن آ چیف آف آرمی اسٹاف جنرل قمر جاوید باجوہ 16می چیف آف آرمی اسٹاف نا حیثیت اٹ پاک فوج انا کمان ءِ سنبھالا، سبکدوش مروک آ آرمی چیف جنرل راحیل شریف روایتی چھڑی”ملاکہ“ ءِ پوسکن آ آرمی چیف جنرل قمر جاوید باجوہ نا حوالہ کرے۔ راولپنڈی ٹی کمان بدلی کن پروقار دود اس اڈتننگا۔ دود اٹی اسپیکر قومی اسمبلی ایاز صادق، وزیر دفاع خواجہ آصف، بنجائی وزیر دفاعی پیداوار رانا تنویر، سلاہکار خارجہ سرتاج عزیز، وزیر سیفران عبدالقادر بلوچ، وزیر مملکت اطلاعات و نشریات مریم اورنگزیب تون اوار پارلیمنٹ نا باسک و بڑزکو سول و فوجی کمامدارآک ساڑی ئسر۔
پاک فوج انا بدلی کمان نا دود اٹی چیئرمین جوائنٹ چیفس آف اسٹاف کمیٹی جنرل زبیر حیات، فضائیہ و بحریہ نا سروک، درملکی سفارتکار آتون اوار ریٹائرڈ فوجی افسر و اوفتا خاہوت آک ہم ساڑی ئسر۔ داوخت آ دود انا مہمان خاص جنرل راحیل شریف ءِ فرنٹیئر فورس رجمنٹ نا دستہ و جنرل قمر جاوید باجوہ ءِ بلوچ رجمنٹ نا دستہ سلامی پیش کرے۔ پوسکن آ فوجی سروک نا تعلق بلوچ رجمنٹ آن ءِ۔ داکان مست دود اٹی اعزازی لیفٹیننٹ غلام علی نا سروکی ٹی ملٹری بینڈ سلامی نا چبوترہ نا مون آ کیہی ملی نغمہ غاتا دھن تے خلک، اعزازی گاڑد نا دستہ نا سروکی ءِ میجر حارث اسلم کرے۔
