صدر مملکت ممنون حسین تون یوکرین نا وزیر دفاع جنرل سٹیفن پولٹورک نا اوڑدہی دفاعی پیداوار نا بشخ اٹی پاکستان نا شونداری آن زہمی مسنے و پاکستان نا آزموندہ غاتیان فائدہ ہرفنگ نا خواہش مند ءِ، وزیر دفاع

صدر مملکت ممنون حسین تون یوکرین نا وزیر دفاع جنرل سٹیفن پولٹورک نا اوڑدہی دفاعی پیداوار نا بشخ اٹی پاکستان نا شونداری آن زہمی مسنے و پاکستان نا آزموندہ غاتیان فائدہ ہرفنگ نا خواہش مند ءِ، وزیر دفاع

کراچی(پاکستان نیوز پوائنٹ 23نومبر2016ء) صدر مملکت ممنون حسین پارینے کہ پاکستان یوکرین تون تینا تعلقداری تے بے کچ اہمیت ایتک و ہڑتوم آ کنڈآتا تعلقداری تے پین سوگو کننگ کن پرعزم ءِ۔ داہیت ءِ او کراچی ٹی یوکرین نا وزیر دفاع جنرل سٹیفن پولٹورک تون اوڑدہی نا وخت آ پارے ہراٹی دفاعی پیداوار نابنجائی وزیر رانا تنویر حسین ، سیکرٹری دفاع جنرل (ر) سید محمد اویس وپاکستان اٹی یوکرین نا سفیر ہم اوارئسر۔

صدر مملکت پارے کہ پاکستان و یوکرین نا نیام اٹ واپاری کچ ءِ ودفنگ نا گرج ءِ تانکہ تعلقداری تیٹی پین ودکی مننگ کے۔ اودااومیت نا درشانی ءِ کرے کہ پاکستان ءِ تروک آ واپاری گڑاتیٹی بروک آ اڑاند آتے زوت مر کننگک۔ صدر مملکت پارے کہ پاکستان انفارمیشن ٹیکنالوجی ، جوڑ جاڑ و جہاز سازی نا بشخ آتیٹی یوکرائن نا تکنیکی مہارت آتیان فائدہ ہرفنگ نا خواہش مند ءِ۔

صدر مملکت پارے کہ ہڑتوم آ ملک آتے ہڑتوم آ ملک آتے تین پہ تینی کمکاری و واپار اٹی ودکی کن ویزہ نا شرط آتیٹی بایدے نرمی کروئی مرے۔ صدر مملکت پارے کہ پاکستان و یوکرین نا نیام اٹ تعلیم و پٹ وپول نا بشخ آتیٹی سوگو کمکاری نا گرج ءِ۔ اوہڑتوم آ ملک آتے دودوربیدہ نا مون آ دننگ، گوازی، انسانی وسیلہ غاتا شون و لیبر نا تبادلہ غاتا بشخ آتیٹی ہم کمکاری ءِ ودفنگ آ زورشاغا۔ داوخت آ یوکرین نا دفاع نا وزیر جنرل سٹیفن پولٹورک پارینے کہ او دفاعی پیداوار نا بشخ اٹی پاکستان نا شونداری آن زہمی مسنے و پاکستان نا آزموندہ غاتیان فائدہ ہرفنگ نا خواہش مند ءِ۔