اسلام آباد (پاکستان پوائنٹ نیوز۔20 جولائی۔2016) قومی خبررساں ادارہ ایسوسی ایٹڈ پریس آف پاکستان نا منیجنگ ڈائریکٹر مسعود ملک پارینے کہ تحریک آجوئی کشمیر اٹی مظلوم کشمیری الس نا جہد و قربانی تے تالان کننگ کن پاکستانی میڈیا کلیدی کڑدادا کننگ کیک، میڈیا ءِ غٹ مصلحت آتے اسہ پلو تخسا جہانی ضمیر ءِ ٹوہوہی تمک و کشمیری الس آ بھارتی ظلم و زوراکی ءِ تورفنگ کن صحافی تے پبی وڑاٹ توار بڑزکروئی مریک، پاکستان مقبوضہ کشمیر نا الس نا ہر کہول آ مخ تفی ءِ برجاتخک، بھارتی ظلم انا برخلاف مقبوضہ کشمیر نا الس تینا جیرت مندانہ تحریک نا نتیجہ ٹی ضرور سرسہب مریرہ و اوفتے زوت آجوئی ملک۔
اوچارشنبے آ اے پی پی ہیڈ کوارٹرز اٹی کشمیری تتون یکجہتی نا درشانی و مقبوضہ کشمیر اٹی کودک الس آ بھارتی ظلم انا برخلاف یوم سیاہ نا مناسبت آن دعائیہ دود آن تران کریکہ۔ منیجنگ ڈائریکٹر اے پی پی تینا تران اٹی کشمیری الس تون پورو یکجہتی نا درشانی ءِ کرسا پارے کہ کشمیری الس بھارتی ظلم انا ہرا جیرت و حوصلہ تون مقابلہ ءِ کرینو اونا نتیجہ ٹی او ضرور سرسہب مریرہ و مقبوضہ جموں و کشمیر بھارتی تسلط آن زوت آجو مریک۔
اوپارے کہ اودے مر اف ہراتم کشمیری الس ہم ایلو قوم آتیامبار باوقار وڑاٹ تینا آجوئی دے ءِ اڈ ایتور۔ مسعود ملک پارے کہ کشمیر نا آجوئی پاکستان نا پوروی نا پن ءِ۔ بابائے قوم قائد اعظم محمد علی جناح کشمیر ءِ پاکستان نا شہ رغ گونداسس و اونا آجوئی اسکان برصغیر نا بشخ وپانٹ نا تکمیل مفک۔ اوپارے کہ کشمیریک تینا قربانی تیان تحریک آجوئی کشمیر ءِ زند تخانو۔
اودے دبائفنگ نا غاصبانہ کوشست آتا باوجود کشمیریک بے سروسامانی و بھلو واک اسینا پشت پناہی آن بیدس جبرو استبداد نا بہادری اٹ مقابلہ ءِ کریر۔ اوپارے کہ پاکستان نا سیاسی و عسکری سروک آک ہر کہول آ کشمیر نا معاملہ ءِ چست کریر و اودے پاکستانی الس نا ہم پبی مخ تفی دوئی ءِ۔ ایسوسی ایٹڈ پریس آف پاکستان (اے پی پی) کشمیر نا ویل ءِ تالان کننگ کن پبی کڑدادا کننگ ءِ۔
اوپارے کہ پیشن نا ملک ہم ”اے پی پی“ نا نمائندہ غاک کشمیر نا بابت پبی کوریج کننگ ءُ۔ کشمیر نا کاز ءِ مون آ دننگ کن غٹ ءِ کڑدادا کروئی مریک۔ داکان مست نیشنل کونسل آف رائٹرز نا صدر و پنی کالم نوشتوک نیئر سرحدی تینا تران اٹی اے پی پی نا کنڈآن یوم سیاہ نا مناسبت آن دود انا اڈتننگ نا ستاءِ کرسا پارے کہ اسہ کنڈ مقبوضہ کشمیر اٹی کشمیری مجاہدینک تینا حق خودارادیت کن جہاد کننگ ءُ و ایلو کنڈ نم قلم اٹ جہاد کننگ اورے۔
اوپارے کہ بھارت مقبوضہ کشمیر نا الس آ ہراظلم آتے کننگ ءِ ، او اقوام عالم کن اسہ فکر اسینا لمحہ ءُ۔ اوپارے کہ اقوام متحدہ ءِ داکنڈا توجوہ ترسا تینا پاس کروک آ قرارداد آتا رداٹ کشمیر نا ویل ءِ ایسر کننگ کن کڑدادا کروئی مرے۔ اوپارے کہ پاکستان نا سیاسی و عسکری سروک آک مقبوضہ کشمیر اٹی بھارتی ظلم انا برخلاف کودک کشمیری تا تواراٹی توار ملفینے ہرا ستاء کڑزک۔
نیئر سرحدی پارے کہ کشمیری تا خون گم مفک۔ ڈائریکٹر کوآرڈینیشن اے پی پی محمد نعیم چوہدری پارے کہ پاکستان کشمیری تا حق اٹی ہمیش توار بڑز کرے و کشمیری تے آجوئی ملنگ اسکان ہر کہول آ اوفتا مخ تفی ءِ کننگک۔ اوپار ے کہ مچ آ ملک اٹی یوم سیاہ اڈتننگ داہیت انا ثبوت ءِ کہ ننا است کشمیری الس تون دھڑکک ، گڑاس وخت ضرور لگک ولے آخری فتح کشمیری تا ہی مریک۔
ڈائریکٹرنیوز اے پی پی محمد اکرم ملک تینا تران اٹی پارے کہ اقوام متحدہ نا قرارداد آتارداٹ کشمیری الس ءِ حق خودارادیت بایدے ملے۔ اوپارے کہ کشمیر پاکستان نا شہ رغ ءِ،ہمووخت ضرور بریک ہراتم کشمیری تے اوفتا حق ملک۔ دود انا ایسری آ منیجنگ ڈائریکٹر اے پی پی مسعود ملک کشمیر نا شہید، کشمیری تا جہد نا سرسہبی و زوت آجوئی کن خصوصی دعا کرفے۔ داوخت آ اے پی پی نا ملازم و افسرآک کشمیری ایلم تتون یکجہتی نا درشانی و مقبوضہ کشمیر اٹی بھارتی ظلم انا برخلاف برانز نا وڑاٹ دوتیا مون ءُ پٹی تفیسر۔
