وزیراعظم سلاہکار خارجہ امور سرتاج عزیز نا بھمبر اٹی لین آف کنٹرول آ بھارتی بلااشتعال سم کاری نا ترندی اٹ مذمت

اسلام آباد(پاکستان نیوز پوائنٹ 14نومبر2016ء) وزیراعظم سلاہکار خارجہ امور سرتاج عزیز بھمبر نا علاقہ ٹی لین آف کنٹرول آ بھارتی بلااشتعال سم کاری نا سخت مذمت ءِ کرینے ہراٹی ہفت پاکستانی سپاہی شہید مسر۔ اوشہید مروک آ ورناتا خاہوت آتون ہمدردی نا درشانی ءِ کرے۔ دوشنبے آ دفترخارجہ آن جاری بیان نارداٹ سرتاج عزیز بھارت نا کنڈآن بلااشتعال سم کاری و گولہ باری نا ودوک آ ساڑی آ واقعہ غاتیا گڑتی نا درشانی ءِ کرسا پارینے کہ بھارت نا کنڈآن دانستہ وڑاٹ شاری آبادی و خلق آتے نشانہ جوڑ کننگ انگ ءِ ، داوخت اسکان داسم کاری آن 26سویلین خلنگانو وخت اس کہ 107ٹھپی مسنو ہرافتے ٹی چناونیاڑی ہم ارے وخت اس کہ بھارت نا کنڈآن 2013ء نا سیز فائر معاہدہ نا پورو خلاف ورزی جاری ءِ ہرا جہانی کانود نا خلاف ورزی ءِ۔

سرتاج عزیز پارینے کہ پاکستانی سلہہ بند فوج بھارتی اشتعال انگیزی نا پبی ورندی ءِ تسنے۔ اوپارے کہ بھارت نا کنڈآن دُن انگا گام امن و سلامتی کن خلیس اسے۔ اوپارے کہ پاکستان بھارتی اشتعال انگیزی نا مقابلہ ٹی بے کچ صبر انا درشانی ءِ کننگ ءِ، پاکستان اقوام متحدہ نا مبصر رڑ بھارت وپاکستان آ زورشاغانے کہ او ایل او سی آ سیز فائر نا دا سنگین خلاف ورزی و ہڑتوم آ ملک آتا نیام اٹ غیر المی بے چیٹی نا بارواٹی رپورٹ ءِ اقوام متحدہ نا سلامتی کونسل ءِ زوت گدریفر۔