چیئرمین سینیٹ میاں رضا ربانی نا پیپلز پارٹی نا راہشون جہانگیر بدر نا کذیت آ ڈکھ و غم نا درشانی

ایماندار جہانگیر بدر جمہوری جہد کروک آ السی سیاست نا چاہندار و قابل قدر سیاست دان اس ئس، راجہ ظفرالحق

چیئرمین سینیٹ میاں رضا ربانی نا پیپلز پارٹی نا راہشون جہانگیر بدر نا کذیت آ ڈکھ و غم نا درشانی
ایماندار جہانگیر بدر جمہوری جہد کروک آ السی سیاست نا چاہندار و قابل قدر سیاست دان اس ئس، راجہ ظفرالحق

اسلام آباد(پاکستان نیوز پوائنٹ 14نومبر2016ء) چیئرمین سینیٹ میاں رضا ربانی پاکستان پیپلزپارٹی نا راہشون جہانگیر بدر نا کذیت آ ڈکھ و غم نا درشانی ءِ کرینے۔ میاں رضاربانی پیپلزپارٹی نا مسکوہی سیکرٹری جنرل نا خاہوت تون ہڑزخواہی نا درشانی ءِ کرسا پارے کہ جمہوریت کن جہانگیر بدر نا خذمت آتے است آن دننگ مفک۔ جہانگیر بدر نا خذمت آتے ہمیشہ یات تخنگک۔

اوپارے کہ پاکستان پیپلزپارٹی اسہ عظیم لیڈر و پاکستان اسہ گچین ءُ سیاست دان اسے آن محروم مسنے ۔ سینیٹ نا ڈپٹی چیئرمین مولانا عبدالغفور حیدری پنی سیاسی راہشون جہانگیر بدر نا کذیت آ ہڑزخواہی نا درشانی ءِ کرسا پارے کہ ایماندار نا جمہوریت کن خذمت آتے ہمیشہ یات تخنگک۔ سینیٹ اٹی قائد ایوان راجہ محمد ظفرالحق ہم مسکوہی قائد ایوان سینیٹ جہانگیر بدر نا کذیت آ ہڑزخواہی نا درشانی ءِ کرسا پارے کہ ایماندار جہانگیر بدر جمہوری جہد کروک آ السی سیاست نا چاہندار و قابل قدر سیاست دان اس ئس۔

سینیٹ اٹی قائد حزب اختلاف اعتزاز احسن جہانگیر بدر نا کذیت آ ہڑزخواہی نا درشانی ءِ کرسا خاہوت تون ہمدردی نا درشانی ءِ کرے اونا پاننگ ئس کہ جمہوریت کن خذمت آتے ٹی جہانگیر بدر نا پن نمان ہند اس تخک۔ اللہ تعالیٰ ایماندار نا درجہ غاتا بڑزی و خاہوت ءِ صبر کننگ نا توفیق عطاء فرمائفے۔