اسلام آباد (پاکستان پوائنٹ نیوز۔20 جولائی۔2016) بنجائی وزیر سائنس و ٹیکنالوجی رانا تنویر حسین پارینے کہ ہائیر ایجوکیشن اٹی پین اصلاحات و راج انا سوچ اٹی بدلی ہتنگ نا گرج ءِ۔ ریسرچ کن جتا جی ڈی پی نا 29درسد بجٹ بے کچ کم ءِ۔ سائنس و انسانی تمدن ءِ مون آ دننگ اٹی ہم کڑد اسے۔ ملک اٹی سائنس و ٹیکنالوجی و پوسکن آ ٹیلنٹ ءِ تالان کننگ آ پبی توجوہ تننگ ءِ ، دامسخت کن زوت نیشنل سائنس اسکول نا اڈتنگ ءِ عمل اٹی ہتنگک۔
داہیت آتے او چارشنبے آ داڑے پاکستان سائنس فاؤنڈیشن نا کنڈآن سائنس ٹیلنٹ فارمنگ اسکیم نا دود آن بطور مہمان خاص تران کرسا پارے۔ دود اٹی ملک انا غٹ صوبہ غاتیان مقابلہ غاتا ذریعہ گچین مروک آ 1800 ہونہار طالب علم آک شرکت کریر۔ بنجائی وزیر پارے کہ ملک اٹی سائنس و ٹیکنالوجی نا ترویج کن بھاز زوت نیشنل سائنس اسکول اس اڈ تننگک دا مسخت کن ڈغار ہم دوئی کننگانے۔
اوپارے کہ نیشنل سائنس اسکول نامعیار کیڈٹ کالج آتیان ہم گچین مریک۔ رانا تنویر پارے کہ حکومت ہائیر ایجوکیشن اٹی گچینی کن کیہی مثبت اصلاحات کرینے واہم اوٹی پین اصلاحات نا گرج ءِ ۔ اوورنا تیا زورشاغا کہ او سائیٹفک تعلیم آ توجوہ تخر۔ داڑکن راج انا سوچ اٹی بدلی ہتنگ نا گرج ءِ۔ اوپارے کہ بدقسمتی آن ننا اسہ ہم یونیورسٹی اس جہانی مقابلہ نا اف۔
اوورنا سائنسدان آتے مخاطب کرسا پارے کہ ننا تغ ہمووخت پورو مریک ہراتم نم پورو سائنسدان جوڑ مرسا ملک و قوم ناخذمت کیرے۔ اوپارے کہ حکومت ورناتے پلیٹ فارم اس تسنے، اولیکو مرحلہ کن 1800 ورنا سائنسدان تا گچین سرکاری اسکول آتیان شفافیت و میرٹ نا کمک اٹ کننگانے۔ چیئرمین پاکستان سائنس فاؤنڈیشن محمد اشرف پارے کہ ننا ہمسایہ ملک اٹی سائنس ٹیلنٹ پروگرام 1963آن جاری ءِ وخت اس کہ ننا سوچ اینو ہم ہمودے ہرا 70سال مست ئسک۔ ملک انا سرکاری اسکول آتے ٹی سائنس لیبارٹری تا کچ بے کچ مایوس کن ءِ واہم ساڑی آ حکومت سائنس و ٹیکنالوجی نا مون آ دننگ و ریسچرز آتا کچ ءِ ودفنگ آ توجوہ تسنے۔ حکومت اِرا سال پروگرام کن 1.5ارب روپئی جتا کرینے۔
