بنجائی وزیر واپار خرم دستگیر نا اسلام آبادچیمبر آف کامرس اینڈ انڈسٹری نا پوسکن گچین مروک آ عہدیدار آتا ڈل آتون اوڑدہی ٹی ہیت وگپ

بنجائی وزیر واپار خرم دستگیر نا اسلام آبادچیمبر آف کامرس اینڈ انڈسٹری نا پوسکن گچین مروک آ عہدیدار آتا ڈل آتون اوڑدہی ٹی ہیت وگپ

اسلام آباد (پاکستان نیوز پوائنٹ 11نومبر2016ء) بنجائی وزیر واپار خرم دستگیر پوریاگر برادری آ زورشاغاکہ او حکومت نا واپار ءِ آزادانہ جوڑ کننگ نا ایجنڈہ نا مخ تفی ءِ کیر تانکہ جہانی مارکیٹ اٹی پاکستان نا مسابقت نا لائخی ءِ گچین جوڑ کننگ مرے۔ 2006ء ٹی چین اتون آزادانہ واپاری معاہدہ غا دستخط نا حوالہ ءِ ترسا وزیر پارے کہ قابل برآمد مصنوعات آتے کن خام مال نا درآمد نا بابت پاکستان ءِ بھاز فائدہ مس و داڑآن پاکستانی مصنوعات آتے مسابقتی جوڑ کننگ اٹی ہم کمک رسینگا۔

اوداہیت ءِ اسلا م آباد چیمبر آف کامرس اینڈ انڈسٹری نا پوسکن گچین مروک آ عہدیدار آتا ڈل اتون اوڑدہی نا وخت آ پارے۔ بنجائی وزیر واپار کاروباری خواجہ غاتا نمائندہ غاتے باوری ترفے کہ برطانیہ نا یورپی یونین آن پیش تمنگ آن گڈ پاکستان آن جی ایس پی پلس معاہدہ نا چٹنگ نا ہچ ءُ گما ن اس اف۔ وزیر واپار پارے کہ نن دارداٹ پین پیش رفت کرسا برطانیہ نا پاکستان تون ہم جی ایس پی پلس کون آ معاہدہ کننگ کن ہیت وگپ کننگ ءُ تانکہ ہڑتوم آ ملک آک مارچ 2019ء آن گڈ ہم واپاری تعلقداری تے سوگو جوڑ کننگ کیر۔

وزیر پارے کہ پاکستان پاکستان مسکوہی اسہ عشرہ غان جتا معیشت آتون آزادانہ واپاری معاہدہ غادستخط آتیٹی ہچ ءُ قابل ذکر پیش کش کتویسس ولے سوگو بنداو تیا برآمدات آتے ودفنگ کن داسہ نن ترکی، تھائی لینڈ، ایران و سویلی کوریا تون آزادانہ واپاری معاہدہ غاتے کن ہیت وگپ کننگ اُن۔