اسلام آباد(پاکستان نیوز پوائنٹ 11نومبر2016ء) وزیر داخلہ چوہدری نثارعلی خان پارینے کہ انگریزی اخبار نا خبر سیکورٹی لیک اف، دروغ نا خبر اسے، خواوہ کہ دامعاملہ غا انکوائری نا نتیجہ غاک زوت الس نا مون آ بریر تانکہ سیاسی مقصد تخوک آک بے نقاب مریر، ہر دوبہ وزیراعظم آ خلنگک ، وزیراعلیٰ و ڈی جی آئی ایس آئی ٹی تلخ کلامی تو درکنار اختلاف رائے ہم متو، غیر ریاستی عنصر آتا بارواٹی پالیسی متفقہ ءِ، سیاسی مقصدآتے کن دھرنہ تروک آک پین کاریم اس پٹر، بلاول غیر سنجیدہ ءُ چناسے ہرادے سیاست نا ”الف ب“ نا ہم خبر اف۔
جمعہ آ داڑے نادرا ہیڈ کوارٹر اٹی صحافی تتون ہیت وگپ کرسا وزیر داخلہ اسہ سوج اسے نا ورندی ٹی پارے کہ یوم اقبال آ چھٹی ہی ہلوکہ ہنداخاطران چھٹی مفننگ نا نوٹیفکیشن جاری کننگ نا ہچ ءُ گرج اس ہلوکہ، مست آن چھٹی تا بہتات ءِ ، ننے کاریم کننگ نا عادت شاغوئی مرے۔ ایف آئی اے ءِ پارت کرینٹ کہ چھٹی نا جعلی نوٹیفکیشن جاری مننگ نا معاملہ نا جاست و پاست کے۔
وزیر داخلہ پارے کہ سوشل میڈیا آ دروغ، فریب و بہتان تراشی نا طوفان برپاءِ، ایف آئی اے اونا توننگ کن گام گیج کے و ہراکان دا اپ لوڈ کننگرہ اونا ڈس و نشان ءِ خلنگ نا پارت کرینن تانکہ دا چرجوئی بند مرے۔ اوپارے کہ یوم اقبال نا درست وڑدادے کہ نن اقبال نا بابت سیمینار کین و طالب علم و پوسکن آ نسل ءِ اقبال نا فکر و سوچ آن روشناس کرفین۔ پرویز خٹک نا بیان نا بابت اسہ سوج اسے آ اوپارے کہ ہرابندغ آک داملک اٹی انتشار تالان کننگ و بیدادی نا سیاست کننگ خوارہ اوفتے کن کانود ءِ ڈکٹیٹر مروئی مرے۔ وزیراعلیٰ پارے کہ غلط ءُ جاگہ سے آ سلوک اُٹ تو ای اوڑتون صرف داخس پاننگ خواوہ کہ ای تو 32سال آن اسہ ہی جاگہ (اسہ ہی جماعت اٹی ) سلوک اُٹ، اوتیناجاچ ءِ ہلے او ہراڑے ہراڑے سلیس۔
