راولپنڈی(پاکستان نیوز پوائنٹ 11نومبر2016ء) پاک فوج انا سروک جنرل راحیل شریف سوات نا علاقہ مینگورہ ، کانجو و خوازہ خیلہ نا دورہ ءِ کرے ، دورہ نا وخت جنرل راحیل شریف وزیراعلیٰ و گورنر خیبر پختونخواتون اوار سوات کینٹونمنٹ نا بنداو ءِ تخا، ڈیہہ ٹی پائیدار امن کن علاقہ والا تا بھلو کچ اسے نا خواست آ 8ستمبر 2015ء آ سوات کینٹونمنٹ نا منظوری ءِ تننگاسس۔
پاک فوج انا شعبہ تعلقات عامہ (آئی ایس پی آر) نا رداٹ پاک فوج انا سروک جنرل راحیل شریف دود آن تران کرسا سوات نا غیور الس ءِ خراج تحسین پیش کرے ہرا دہشت گرد آتا برخلاف وادی سوات اٹی سیکورٹی فورس آتون سلوک ءُ۔ سوات نا الس ءِ داتاریخی دے انا وخت آ مبارکباد پیش کرسا جنرل راحیل شریف پارے کہ سیکورٹی فورس آک وادی سوات ءِ ہمیشہ کن دہشت گرد آتیان پاک تخنگ، پائیدار امن و سلامتی نا قیام کن تینا کڑد ءِ ادا کرسا کیرہ ۔
اوپارے کہ سوات اٹی کینٹونمنٹ نا قیام دہشت گرد آتے کن عبر ت نا نشان اسے، سوات کینٹ نا قیام آن امن و ایمنی نا بحالی کن کانود نافذ کروک آ ادارہ غاتا پت انا ودنگ تون اوار اوار علاقہ ٹی پائیدار امن کن ہروڑنا خلیس آتون مون تننگ اٹی کمکار ثابت مریک۔ اوپارے کہ سوات کینٹونمنٹ راجی شون اکن مفید ثابت مریک۔ اوپارے کہ ننا اولیت ءِ کہ اسہ حکمت عملی سے نا رداٹ فاٹا و مالاکنڈ نا شونداری نا ڈٹ ءِ پورو کننگے۔
پاک فوج دہشت گرد آتا برخلاف مروک آ آپریشن نا علاقہ غاتیٹی داوخت اسکان 700 بھلو و چنکو ڈٹ شروع کرینے ہرافتا مقصد ہندی کہول آ زند انا آب ءِ گچین جوڑ کننگ کن مون تروک ویل آتا ایسری ءِ کروئی ءِ ہرا انتہاپسندی نا سوب وجود اٹی بسوسر۔ اوپارے کہ مچ آ دنیا پاک فوج نا دہشت گردی نا برخلاف سرسہب جنگ و دہشت گرد آتا برخلاف آپریشن نا وخت عارضی وڑاٹ نقل مکانی کروک آتا پدی و بحالی کن خذمت آتا اعتراف کیرہ۔
آرمی چیف دہشت گردی نا خلاف ہندی خلقت آتا پدریسہ مخ تفی نا ستاءِ کرسا پارے کہ داخلقت آتا مخ تفی و قربانیک ننا سرسہبی ٹی اہمیت ناحامل ءُ۔ وزیراعلیٰ خیبر پختونخوا و ہندی سروک آک آرمی چیف جنرل راحیل شریف نا سوات کینٹونمنٹ نا اڈتننگ آ منت واری ءِ ادا کریر۔ جنرل راحیل شریف ساڑی ہی ٹی تیار مروک آ شیخ خلیفہ بن زید ماڈل ہسپتال سوات ناہم دورہ ءِ کریر و ہسپتال اٹی درمان نا گچین آسراتی تا فراوانی نا ستاءِ کریر۔
او ہندی خلقت، ہسپتال نا اسٹاف آتون اوار یواے ای و اونا سروک آتا منت واری ءِ ادا کریر ہرافتا کمک آن دا علاقہ غاتیٹی راجی و اقتصادی شون مسنے۔ یو اے ای نا سفیر عیسی عبداللہ الباشی نعمائی، ڈائریکٹر یو پی اے پی ہم داوخت آ ساڑی ئسر۔ جنرل راحیل شریف سوات اٹی زیر تعمیر آرمی پبلک اسکول ناہم دورہ ءِ کرے۔ کورکمانڈر لیفٹیننٹ جنرل ہدایت الرحمان ، جی او سی سوات میجر جنرل آصف غفور آرمی چیف نا خیرمقدم ءِ کریر۔
