کوئٹہ(پاکستان نیوز پوائنٹ 11نومبر2016ء) بنجائی وزیر سیفران جنرل (ر) عبدالقادر بلوچ پارینے کہ ساڑی آ حکومت بے روزگاری نا چٹفنگ کن ہروڑنا گام گیج کننگ ءِ، داچرجوئی ٹی بنجائی و صوبائی حکومت روزگار نا پوسکن آ وارخواہی ودی کننگ کن خاطر خواہ گام گیج کننگ ءِ۔ داخیال آتا درشانی ءِ بنجائی وزیر خاران نا دورہ نا وخت آ پی پی ایچ آئی خاران و واشک نا کنٹریکٹ ملازم آتون اوڑدہی نا وخت آ کرے۔
کنٹریکٹ ملازم آک بنجائی وزیر ءِ تینا آخبتی نا بارواٹی سرجم معلومدار کریر و درخواست پیش کریر ہراڑآ بنجائی وزیر جنرل (ر) عبدالقادر بلوچ اوفتے یخین دہانی کرفسا پارے کہ دا ویل آن بابت او بلوچستان نا وزیراعلیٰ نواب ثناء اللہ زہری تون خصوصی ہیت وگپ کیک۔ اوپارے کہ بلوچستان نا پسماندگی نا چٹفنگ تون اوار بے روزگاری نا چٹفنگ اولین اولیت آتیٹی اوارءِ۔
ہراوڑ ایلو محکمہ غاتا ملازم آک آخبتی مسنو کوشست کننگک کہ پی پی ایچ آئی کون آ کاریمی ادارہ نا ملازم آتے ہم آخبتی کننگ مرے تانکہ دا ادارہ جان جوڑی نا بشخ اٹی پین گچینی اتے و داڑآن بلوچستان نا مسہ ہزار آن زیات کنٹریکٹ ملازم آتا دیرینہ ویل ہم ایسر مریک۔ اوڑدہی ٹی میرنور احمد کبدانی، میر عطاء اللہ مینگل، محمد عیسیٰ محمد حسنی، منصور احمد کبدانی ، طارق علی بلوچ، عظمت اللہ محمد حسنی و ایلو ملازم آک اوار ئسر۔
