اسلام آباد(پاکستان نیوز پوائنٹ 11نومبر2016ء) بنجائی وزیر دفاعی پیداوار رانا تنویر حسین پارینے کہ امریکہ پاکستان تون اسٹریٹجک پارٹنر شپ ءِ اہمیت ایتک۔ ریڈیو پاکستان تون ہیت وگپ کرسا اوپارے کہ امریکہ ٹی پوسکن آ صدرنا گچین کاری و گچین کاری نتیجہ غاتا معاملہ امریکہ نا تہہ نا معاملہ اسے و ہر بروک آ صدر منصب آ تولنگ آن گڈ ایلو ملک آتون تعلقداری تا بت تینا خارجہ پالیسی ترتیب ایتک۔
اوپارے کہ امریکہ نا اوغانستان ، ایران نا حالیت و دہشت گردی نا معاملہ غاتیان جوانی اٹ معلومدار ءِ، امریکہ پاکستان تون اسٹریٹجک پارٹنر شپ انا اہمیت آن معلومدار ءِ و اودے اہمیت ایتک۔ بنجائی وزیر دفاعی پیداوار پارے کہ پوسکن گچین مروک آ صدر ٹرمپ مقبوضہ کشمیر و پاکستان نا سیمی علاقہ غاتیٹی بھارت نا بیدادی آن معلومدار ءِ و اونا ذکر ءِ اوتینا اسہ بیان اسے ٹی ہم کرینے۔
رانا تنویر پارے کہ پوسکن گچین مروک آ امریکی صدر دا بابت لائحہ عمل اس ضرور ترتیب ایتک۔ اواومیت نا درشانی ءِ کرے کہ اگہ امریکہ خوائے تو نیام تمسا کشمیر نا ویل ءِ ایسر کرفنگ کیک۔ پاک امریکہ تعلقداری نا بابت چست کروک آ سوج انا ورندی ءِ ترسا اوپارے کہ صدر ٹرمپ نا سرسہبی آن گڈ انا بیان آک اونا گچین کاری مہم نا خیال آتیان جتاءُ، صدارتی قلمدان ءِ سنبھالنگ آن گڈ اونارویہ غاتیٹی پین مثبت تبدیلی بریک و پاکستان ہم امریکہ تون گچین تعلقداری تا خواہش مند ءِ۔
