کراچی(پاکستان نیوز پوائنٹ 10نومبر2016ء) سینیٹ ءِ قائمہ کمیٹی برائے منتقلی وت واجہی ءِ چیئر مین سینیٹر میر کبیر احمد محمد شہی ءَ گشتگ انت کہ صوبہ آنی مسئلہ ھل کنگءِ ھاتر ءَ ھواری مفاد کونسل ءِ مراگش زوت اڈ دئیگ بیت ہژدہمی ترمیم ءِ ردا صوبہ آں وت واجہی ءِ برگ ءِ کار سرجم بوتگ گڑا سینیٹ ءَ کمیٹی جوڑ کنگءِ ضلورت نہ کپیت۔ اے ھیال آنی درشانی ءَ پنچ شمبے ءَ چیف سیکرٹری سندھ ءِ کار گِس ءَ اڈ بوؤکیں مراگش ءَ پد میڈیا ءِ گوں گپ ءُُ تران کنگ ءَ کرتگ۔
آئی ءَ گشتگ کہ مئے ہر ممکن کوشست انت کہ بنجاہ ءُُ چاریں صوبہ آں گوں یکجا منتقلی وت واجہی ءِ معاملہ شریں وڑءَ بہ کن انت۔ آئیءَ گشتگ کہ ماں سندھ حکومت ءِ نیمگ ءَ پیش کرتگیں تحفظات اُشتگ انت باز زوت خیبر پختونخوا ءُُ پنجاب ءِ حکومت آں گوں میٹنگ کنگ ءَ زوت شریں آسر ءَ سر بہ باں ۔ آئی ء َ گشتگ کہ ھواریں مفادات کونسل ءِ میٹنگ نود روچ ءِ تہا بوھگ لوٹیت۔
آئیءَ گشتگ کہ ھواریں مفادات کونسل ءِ میٹنگ با قاعدگی ءَ نہ بوھگ ءِ وجہءَ صوبہ آنی مسئلہ ھل کنگ ءَ مشکل ءِ دیمپانی انت۔ دیما بنجاہی وزیر برائے پیٹرولیم ءُُ قدرتی وسیلگ شاہد خاقان عباسی ءَ قدرتی وسیلگ ءِ ھوالہ ءَ صوبہ ءُُ بنجاہ ءَ فنڈ ءِ بہر ءُُ بانگ، بنجاہی وزیر برائے پورٹ اینڈ شپنگ میر حاصل خان بزنجو ءَ کورنگی نشنگ ہار بر ءُُ بنجاہی سیکرٹری نیشنل ہیلتھ اینڈ سیکورٹی محمد ایوبءَ جان سلامتی ءِ ھوالہ ءَ ھستیں مسئلہ ءُُ لیڈی ہیلتھ ورکر آنی معاملہ ءِ سرا کمیٹی ءَ بریفنگ داتگ۔ مراگش ءَ کمیٹی ءِ باسک سینیٹر نواب سیف اللہ مگسی، طاہر حسین مشہدی ، نثار محمد ، تاج حیدر، محمد عثمان کاکڑ ، عطاء الرحمن سسی پلیجو ءُُ سعید غنی ءَ بہر زرت انت۔
