اسلام آباد(پاکستان نیوز پوائنٹ 10نومبر2016ء) پاکستان امریکہ نا پوسکن آ انتظامیہ تون خڑکی تعلقداری نا خواہش نا درشانی ءِ کرسا پارینے کہ پاک امریکہ تعلقداری ہفت دہائی تیامحیط ءُ، پوسکن گچین مروک آ امریکی صدر نا کشمیر نا ویل آ ثالثی نا خیرمقدم ءِ کینہ، امریکہ ٹی سیاسی تبدیلی ہردے نا وڑءِ و داڑآن ہڑتوم آ کنڈآتا تعلقداریک زہمی مفسہ، برطانوی وزیراعظم نا دورہ بھارت نا وخت آ کشمیر نا ویل انا تنازعہ ءِ نظر انداز کننگ آ تینا گڑتی آن معلومدار کرینے دا معاملہ سلامتی کونسل نا غٹ آخبتی باسک آتامون آ چست کینہ، پاکستان اوغانستان اٹی امن نا اڈتننگ کن تینا کڑد ءِ ادا کرسا کیک، پاک سعودی تعلقداری نا ماسک بھلن و سوگو بنداو تیا استوار ءُ، سعودی عرب مشاق و جے ایف 17تھنڈر جہاز آتیٹی است خواہی ظاہر کرینے، پاکستان اٹی حقانی نیٹ ورک نا ہچ ءُ وجود اس اف، تخریبی سرجزآتیٹی اوار ہشت آن شش بھارتی سفارتکار آک تینا ملک آ پدی ہنانو۔
دفترخارجہ نا ترجمان محمد نفیس زکریا پنچ شنبے آ داڑے ہفتہ وار پریس بریفنگ نا وخت آ پاک امریکہ تعلقداری تیان بابت صحافی تا جتا سوج آتا ورندیءِ ترسا پارے کہ پاکستان و امریکہ نا نیام اٹ مسکوہی ہفت دہائی تیان تعلقداریک قائم ءُ، پاکستان امریکہ نا پوسکن آ انتظامیہ تون خڑکی تعلقداری ناخواہندار ءِ، پاکستان نا امریکہ تون معیشت،دفاع۔ سائنس و ٹیکنالوجی ، تعلیم، انسداد دہشت گردی و سٹریٹجک معاملہ غاتون اوار کثیر الجہتی و سٹریٹجک تعلقداریک قائم ءُ ، نن کشمیر نا تنازعہ غا پوسکن آ گچین مروک آ امریکی صدر نا ثالثی نا پیش کش نا خیرمقدم ءِ کینہ۔
ترجمان پارے کہ کشمیری الس تینا حق و حق خودارادیت کن قربانی تننگ ءُ۔ پاکستان کشمیری الس نا سفارتی ، اخلاقی و سیاسی مخ تفی ءِ برجا تخک۔ ترجمان پارے کہ پاکستان ءِ مقبوضہ کشمیر اٹی بھارتی فورسز آتا کنڈآن پدریسہ بیدادی و انسانی حق انا خلاف ورزی تیا گڑتی ءِ۔ حقانی نیٹ ورک نا بابت اسہ سوج اسے نا ورندی ءِ ترسا ترجمان پارے کہ اینخو سال جولائی آن داوخت اسکان حقانی نیٹ ورک نا ہشت کمانڈر اوغانستان اٹی تپاخت کرینو ، ہرا داہیت انا شاہدی ءِ کہ دا نیٹ ورک نا پاکستان اٹی ہچ ءُ وجود اس اف۔
اوغانستان نا بابت اسہ سوج اسے نا ورندی ءِ ترسا اوپارے کہ پاکستان اوغانستان اٹی امن و سوگوی نا خواہندار ءِ، ہرانہ صرف ہڑتوم آ ملک بلکن غٹ ڈیہہ نا مفاد اٹی ءِ۔ پاکستان اوغانستان اٹی امن نا اڈتننگ و تعمیر نو کن تینا کڑد ءِ ادا کرسا کیک۔ سعودی آرمی چیف نا دورہ پاکستان نا بابت سوج انا ورندی ءِ ترسا ترجمان پارے کہ پاکستان و سعودی عرب نا تعلقداری نا ماسک بھلن و سوگو بنداو تیا استوار ءُ، سعودی عرب ایف 17تھنڈر و مشاق جہاز آتا ہلنگ اٹی است خواہی ظاہر کرینے ، ہڑتوم آ ملک آتا نیام اٹ دا چرجوئی ٹی ہیت و گپ جاری ءِ۔
بھارتی ریاست مدھیہ پردیش اٹی جعلی مقابلہ غاتیٹی مسلمان تا تپاخت نا بابت سوج آ ترجمان پارے کہ جہانی برادری ہم بھارت اٹی مسلمان تتون اوار ایلو اقلیتی رڑآتا حالیت آتیا گڑتی نا درشانی ءِ کرینے۔
