اسلام آباد(پاکستان نیوز پوائنٹ 10نومبر2016ء) وزیراعظم محمد نواز شریف نا خصوسی کمکار ڈاکٹر مصدق ملک پارینے کہ امریکہ نا پوسکن گچین مروک آ صدر ڈونلڈ ٹرمپ نا گچین کاری مہم نا وخت آ تروک آ سخت بیان آتا اثروخت انا تدینگ انگ تون دم کشتہ مریرہ۔ ریڈیو پاکستان تون ہیت وگپ اٹی اوپاکستانی حکومت و الس نا کنڈآن امریکی الس ءِ 45می صدر نا گچینی آ مبارکبادی پیش کرسا پارے کہ گچین کاری مہم و ریاست نا انتظام اِراجتا معاملہ ءُ۔
اوپارے کہ صدر گچین مننگ آن گڈ صدر ٹرمپ ہرابیان ءِ تس اوٹی اوپارے کہ او غٹ امریکی تا صدر ءِ و داسہ امریکہ نا شون و شونہالی نا سفر نا بناءِ کینہ، داڑآن ظاہر مریک کہ اونا گچین کاری مہم نا وخت کاریم اٹ اتوک آ سخت لوز آک ریاست ناانتظام نا عمل اٹی دم کشتہ مریرہ۔ وزیراعظم نا خصوصی کمکار پارینے کہ صدر ٹرمپ ہم مسکوہی نا امریکی صدر آتیانبار امریکہ نا شون اکن کاریم کیرہ ۔
پاک امریکہ تعلقداری نا بابت چست کروک آ سوج انا ورندی ءِ ترسا اوپارے کہ امریکہ نا خارجہ پالیسی ٹی پاکستان ءِ او ہند ضرور ملک ہرانا او حقدار ءِ ۔ اوپارے کہ ہڑتوم آ ملک آتا اولین اولیت دہشت گردی و انتہاپسندی نا خاتمہ ءِ و دا جنگ اٹی پاکستان امریکہ نا اتحادی ءِ۔ اوپارے کہ امریکہ اوغانستان اٹی امن اڈتننگ خواہک و اوغانستان اٹی سوگوپاکستان نا مفاد اٹی ہم ارے۔
ایران تون امریکہ گچین تعلقداری خواہک وپاکستان ہم نیامی ایشیائی ملک آتیان گچین تعلقداری تا خواہندار ءِ۔ پاک چین اقتصادی راہداری نا بت چست کروک آ سوج انا ورندی ءِ ترسا اوپارے کہ روس و نیامی ایشیاء اسکان راہداری ملنگ آن مسکوہی سد سال آتیان جنگ آتیٹی اختہ ملک آک شون و شونہالی نا کنڈآن ہِننگ نا بناءِ کیرہ و داڑآن پاکستان اٹی ہم شون نا پوسکن آ کسر آک ملنگرہ۔
