اسلام آباد(پاکستان نیوز پوائنٹ 10نومبر2016ء) وزیر مملکت دیر و بجلی عابد شیر علی بجلی نا لوڈشیڈنگ نا پوسکن آ پلان آ عملدرآمد نا جاچ ءِ ہلنگ کن اسلام آباد اٹی نیشنل پاور کنٹرول سنٹر نا دورہ ءِ کرے۔ داوخت آ وزیر مملکت دیر و بجلی ءِ نیشنل پاور کنٹرول سنٹر نا کمامدارآک بجلی نا ترسیل آن بابت سرجم بریفنگ تسر۔ وزیر مملکت پارت کرے کہ وزیراعظم نا حکم آتا رداٹ لوڈشیڈنگ نا وخت ءُ پاس اٹی کمتی ءِ ہردروشم اٹی باوری جوڑ کننگے۔
اوپارے کہ لوڈشیڈنگ اٹی نمان کمتی ساڑی آ حکومت نا اہم ءُ کارنامہ اسے و نن لوڈشیڈنگ نا پورو چٹفنگ نا کنڈا ہِننگ اُن۔ اوپارے کہ داہیت خوش آئند ءِ کہ مسکوہی ٹی بجلی نا ترسیلی نظام نا بابت ماہانہ سد آ غاوک بسرہ ولے داسہ دا غاوک چٹانو و گیشتر وخت آتیٹی دا غاوک بجلی نا پورو بند مننگ یا غیر اعلانیہ لوڈشیڈنگ نا بابت آن مریرہ۔ اوپارے کہ ڈسٹری بیوشن نا کہول آ لوڈشیڈنگ نا تینٹ چاری گری کن اسہ نظام اس وضع کننگ انگ ءِ ، دانظام نارداٹ صارف آک تینا فیڈرآتا لوڈشیڈنگ نا چاروکی ءِ کننگ کیرہ۔
اوپارے کہ جنریشن کمپنی و آئی پی پیز آتون بجلی نا پیداوار کن وافر کوڑی ساڑی ءِ۔ اونیشنل پاور کنٹرول سنٹر نا کمامدارآتے پارت کرے کہ بجلی نا فراوانی نا حالیت آتیا پدریسہ سخت نظر شاغنگے و ہراڑے جاگہ اس غاو یاخامی اس نظر برے تو اودے دمدستی سہی کننگے۔ بجلی نا ترسیل نا بابت اسہ ڈیوالائی اسے ہم سگنگ پننگک۔
