کیہی وزارت و ڈویژن آتا شونداری ڈٹ آتے کن جم وڑاٹ 1کھرب 56ارب 52کروڑ روپئی آن زیات نا فنڈ جاری

اسلام آباد(پاکستان نیوز پوائنٹ 10نومبر2016ء) وزارت ڈٹ بندی و شونداری اینخو مالی سال انا سرکاری بشخ انا شونداری پروگرام اٹی کیہی وزارت و ڈویژن آتا شونداری ڈٹ آتے کن جم وڑاٹ 1کھرب 56ارب 52کروڑ روپئی آن زیات نا فنڈز جاری کرینے۔ حکومت اینخو مالی سال اٹی سرکاری بشخ انا شونداری پروگرام کن 8کھرب روپئی نا فنڈ جتاکرینے۔ پلاننگ کمیشن نا جاری کروک حساب وکتاب نا رداٹ حکومت ایرا کن 1ارب93کروڑ، پائیدار شونداری ہدف آتے کن 20 ارب، عارضی وڑاٹ بے اُرا مروک آ بندغ آتا بحالی کن 42ارب 56کروڑ، سیفران/فاٹا کن 8ارب 25کروڑ، نیشنل ہائی وے اتھارٹی کن 19 ارب ، واپڈا پاور سیکٹر کن 6ارب 80کروڑ، دیر و بجلی ڈویژن نا شونداری ڈٹ آتے کن 80کروڑ، پاکستان اٹامک انرجی کمیشن کن 6ارب 33کروڑ، ریلویز ڈویژن کن 13ارب 52کروڑ و جان جوڑی کن 5ارب 50کروڑ روپئی تون اوار کیہی شونداری ڈٹ آتے کن فنڈ جاری کرینے۔