اسلام آباد (پاکستان نیوز پوائنٹ 9نومبر2016ء) بنجائی وزیر ڈٹ بندی ، شونداری و اصلاحات پروفیسر احسن اقبال پارینے کہ نجی بشخ معیشت نا شون اٹی مخ انا ملی نا حیثیت تخک و او چین پاکستا ن اقتصادی راہداری ڈٹ اٹی زیات آن زیات ساڑی مننگ کن کوشست آتے ترند کیر تانکہ دا تاریخی ڈٹ ءِ ایسری اسکان سرکرسا ملک اکن فائدہ مندنتیجہ دوئی کننگ مرے۔ سی پیک پاکستان اٹی زرکاری ءِ مون آدننگ کن اسہ پوسکن ءُ رجھان اس ودی کننگ ءِ انتئے کہ یورپ انا گاڈی جوڑ کروک آکمپنی رینالٹ تون اوار بھاز انگا درملکی زرکار آک داسہ پاکستان اٹی زرکاری کننگ اٹی است خواہی ہلنگ ءُ۔
داخیال آتا درشانی ءِ او اسلام آباد چیمبر آف کامرس اینڈ انڈسٹری نا اسہ ڈل اسے تون ہیت وگپ کرسا کرے ہراصدر خالد اقبال ملک نا سروکی ٹی اوڑتون اوڑدہی کریر۔ احسن اقبال پارے کہ چین نا بڑزکو کہول نا سروک آک کیہی دیوان آتیٹی سی پیک نا کمک اٹ پاکستان اٹی صنعتی شون ءِ مون آ دننگ نا یخین دہانی کرفینے ہنداخاطران ننے دُنو ہچ ءُ گام اس ہرفوئی مف ہراڑآن چین نا خیر سگالی زہمی مرے اوپارے کہ پوریا گر برادری سی پیک اٹی زیات آن زیات جوائنٹ وینچرز و پارٹنر شپ اکن کوشست کیر و دامقصد کن ٹیکنالوجی و مشینری ءِ اپ گریڈ کننگ آ توجوہ ایتر۔
اوپارے کہ لیبر نا اجرت زیات مننگ نا سوب چین داسہ کم اجرت والا ملک آتا کنڈآ تینا صنعت آتے گدریفنگ نا سجفنگ ءِ ہنداخاطران پاکستان کن دا جوان ءُ موقع اسے کہ چین نا صنعت کار آتے داڑے صنعت خلنگ آ آمادہ کننگے۔ اوپارے کہ چین تون پوسکن آ ٹیکنالوجی و مہارت ءِ وخت اس کہ نن تون ہڑزان و گچین افرادی واک ارے ہنداخاطران ہڑتوم آ ملک آتا نیام اٹ کاروباری شریداری نا عمدہ وارخواہی ساڑی ءِ۔ اسلام آباد چیمبر آف کامرس اینڈ انڈسٹری نا سینئر نائب صدر خالد ملک، نائب صدر طاہر ایوب ، خالد جاوید، میاں اکرم فرید، میاں شوکت مسعود ، محمد اعجاز عباسی ، شیخ عامر وحید، محمد زکریا اے ضیا، نعیم صدیقی ، خالد چوہدری ، محمد حسین و چوہدری مظہر حسین ہم ڈل اٹی ساڑی ئسر۔
