گوجرانوالہ(پاکستان نیوز پوائنٹ 9نومبر2016ء) بنجائی وزیر واپار انجینئر خرم دستگیر خان پارینے کہ روشن پاکستان نا مزل نا دوئی کن نواز شریف ناسروکی المی ءِ ، الس شونداری دشمن تے اوفتا مذموم مقصد آتیٹی سرسہب مننگ کن ہلیپک، شہباز شریف نا سخت خواری نا بدولت پنجاب اٹی میرٹ نا بول بالا مس، حکومتی پالیسی تا بدولت ورناتے کن پوسکن ءُ روزگار نا وارخواہی ودی مننگ ءِ ، خادم پنجاب علم حاصل کننگ نا جستجو کروک آتا کسر اٹی بروک وسیلہ غاتا کمتی نا دیوال اس بٹینے۔
داخیال آتا درشانی ءِ او انصار ویلفیئر سوسائٹی گوجرانوالہ نا کنڈآن اڈ تروک آ دود آن تران کرسا کرے۔ اوپارے کہ نواز شریف نا سروکی ٹی ملک پدریسہ شون نا کنڈآ ہِننگ ءِ ، ملک اٹی گیس بجلی نا کمتی ءِ پورو کننگ انگ ءِ ، پوسکن ءُ ہسپتال و کالج جوڑ کننگ انگ ءِ، فیکٹری ، کارخانہ و روڈ جوڑ مننگ آن خلقت آتے روزگار نا وارخواہی دوبننگ ءِ ولے افسوز کہ شونداری دشمن ٹولہ دافتے خننگ اٹی اف انتئے کہ اوفک تینا خن تے تفینو ، بنجائی وزیر پارے کہ پانامہ پیپرز اٹی نواز شریف نا ہچ ءُ تذکرہ اس اف ہنداخاطران او عدالت آن سرخرو مریک و بروک آ الیکشن اٹی الس نت چکوک آتے ہرفسا پیشن خسرہ۔
ایم پی اے چوہدری اشرف علی انصاری پارے کہ الس شون والا جماعت مسلم لیگ ن تون تفوک ءِ، انجینئر خرم دستگیر خان نا سروکی نا بدولت گوجرانوالہ نا کونہ کونہ ٹی شونداری کاریم تا جال اس شاغنگانے و ارب آ روپئی نا میگاپروجیکٹ پورو کننگ انگ ءِ، داوخت آ حاجی ناصر آزاد انصاری ، علیم احمد حارث ، شاہد ابراہیم ، محمد حامد و ایلوفک ہم تران کریر۔
