اسلام آباد(پاکستان نیوز پوائنٹ 9نومبر2016ء) وزیر مملکت قومی جان جوڑی سائرہ افضل تارڑ پارینے کہ میڈیکل کالج آتیٹی داخلہ کن میرٹ نا خلاف ورزی کننگ آ سخت کارروائی کننگک۔ چارشنبے آ داکان جاری بیان اٹی اوپارے کہ میڈیکل کالج آتیٹی داخلہ کن پالیسی آ سختی اٹ عمل کننگے و داچرجوئی ٹی ہچ ءُ دروشم اسے ٹی ہچ ءُ سمجھوتہ اس کننگپ۔ اوپارے کہ اگہ کسس میڈیکل کالج آتیٹی داخلہ کن میرٹ نا خلاف ورزی ءِ کرسا خننگا تو اونا برخلاف سخت کارروائی کننگک۔
دا چرجوئی ٹی پالیسی نا رداٹ غٹ میڈیکل کالج آتا مانیٹرنگ کننگک۔ اوپارے کہ نجی میڈیکل کالج آتیٹی داخلہ نا وخت اکن تعلقدار پارت و قواعد ءِ باوری جوڑ کننگے ۔ غٹ نجی میڈیکل کالج آک میرٹ لسٹ انا پابندی ءِ کیر، کم نمبر والا آؤٹ آف ٹرن (Out of Turn) ءِ داخلہ تننگپ۔ غٹ نجی میڈیکل کالج آتیٹی اسہ وڑنا داخلہ فیس مقرر ءِ داڑآن بیدس داخلہ نا مد اٹی ودکی زَر ہلنگ پننگک۔
فیس انا ادائیگی صرف نجی میڈیکل کالج آتا آن لائن اکاؤنٹ اٹی مریک۔ ادارہ نا ویب سائٹ آ اوپن میرٹ لسٹ انا اشاعت المی ءِ و داخلہ کن یو ایچ ایس نا کنڈآن انٹرنس ٹیسٹ انا وڑوڈول لاگوءِ۔ اوپارے کہ داخلہ غاتا بابت پی ایم ڈی سی اسہ خصوصی غاو سیل اس اڈ تسنے۔ وزیر قومی جان جوڑی پارے کہ اینو دا چرجوئی ٹی سیکرٹری قومی جان جوڑی محمد ایوب شیخ انا سروکی ٹی ریجنل ایڈمشن کمیٹی نا دیوان اس مسنے ہراٹی کمیٹی نا باسک آک ساڑی ئسر۔
یات سلے کہ دا پالیسی نا رداٹ ہمو طالب علم آتے رجسٹرڈ کننگے ہرا درکار معیار آ پورو سلرہ۔ داچرجوئی ٹی ایف ایس سی پری میڈیکل کم از کم 60درسد نمبر مننگ المی ءِ۔ میرٹ فارمولا نا رداٹ میٹرک نا 10درسد، ایف ایس سی 40درسد و انٹری ٹیسٹ انا 50درسد نمبر شمار کننگک۔ وخت اس کہ پیشن نا ملک طالب علم آتا MCATو SATٹی 50 درسد نمبر شمار کننگک۔ سرسہب طالب علم آتے ہفت دے انا تہٹی فیس جمع کرفوئی مریک۔ پیشن نا ملک طالب علم آتا ہمو سیٹ آک ہرا پر کننگپس او ہندی طالب علم آتے اوپن میرٹ آ تننگرہ۔ ہر کالج تینا فیس و بینک اکاؤنٹ نمبر ءِ ویب سائٹ آ آویزاں کیک۔ ہندی طالب علم آتے کن سالانہ فیس 6لکھ 42ہزار روپئی مریک۔ وخت اس کہ پیشن ناملک طالب علم آتے کن 18ہزار یو ایس ڈالر سالانہ مقرر کننگانے۔
