بنجائی وزیر ڈٹ بندی و شونداری اصلاحات پروفیسر احسن اقبال نا یو ایس ایڈ تون توانائی کن مربوط سسٹم نا اڈ تننگ کن ایم او یوآ دستخط کننگ نا وخت آ ہیت وگپ

بنجائی وزیر ڈٹ بندی و شونداری اصلاحات پروفیسر احسن اقبال نا یو ایس ایڈ تون توانائی کن مربوط سسٹم نا اڈ تننگ کن ایم او یوآ دستخط کننگ نا وخت آ ہیت وگپ

اسلام آباد(پاکستان نیوز پوائنٹ 8نومبر2016ء) بنجائی وزیر ڈٹ بندی و شونداری اصلاحات پروفیسر احسن اقبال پارینے کہ اقتصادی راہداری آ تہہ نا اختلافات آتے چٹفوئی مریک ، سنگت ملک ءِ داخلی سیاست ءِ اوار کننگ غیر زمواری نا شاہدی اسے، مسکوہی مسہ سال آتیٹی توانائی نا بشخ اٹی غٹ آن زیات زرکاری کننگانے، 2018ء اسکان نیشنل گریڈ اٹی 10ہزار میگاواٹ بجلی اوار مریک۔

داخیال آتا درشانی ءِ او سے شنبے آ داڑے پلاننگ کمیشن اٹی وزارت ڈٹ بندی و شونداری و یو ایس ایڈ نا نیام اٹ توانائی کن مربوط سسٹم نا اڈتننگ کن ایم او یو آ دستخط کرسا کرے۔ بنجائی وزیر پارے کہ داسسٹم نا مقصد ہندن ءُ سینٹر اس اڈ تروئی ءِ ہراڑآن پاکستان اٹی توانائی نا بشخ اٹی کارکڑد ءِ ودفنگ کن کاریم کننگک، دا سینٹر آن ملک اٹی بجلی نا ترسیل نا نظام گچین مریک۔

اوپارے کہ سی پیک آ تہہ نا اختلافات آتے چٹفوئی مریک و سنگت ملک ءِ ننا داخلی سیاست اٹی ہچ وڑنا تنازعہ اس جوڑ کننگ نا گرج اف۔ اوپارے کہ سی پیک آ اسپیکر خیبر پختونخوا اسمبلی تون ہیت مسنے و اونا اختلافات آتے مُر کننگک۔ اوپارے کہ عدالتی کارروائی آن تینٹ خیبر پختونخوا نا نسخان مریک۔ اوپارے کہ خیبر پختونخوا ٹی منڈاڈیم، داسوڈیم و قبائلی علاقہ غاتیٹی ڈیم تیا کاریم مننگ ءِ۔

انڈس ہائی وے و لواری ٹنل آ کاریم ترندی اٹ جاری ءِ ہرا بروک آ سال 2017ء اسکان الس نا آسراتی کن ٹریفک کن ملفنگک ، ایچ ای سی ٹی خیبرپختونخوا ٹی 13آن زیات تعلیم نا ڈٹ آتے منظور کرینے۔ اوپارے کہ راہداری ڈٹ آتا دشمن تا پروپیگنڈہ ٹی برسا گڑاس سیاست دان ڈٹ ءِ متنازعہ جوڑ کننگ ءُ ولے اوفتے پائیدار سنگت چین و پاکستان نا مفاد ءِ مون آ تخوئی مرے۔

کانودی چارہ جوئی تینٹ خیبر پختونخوا کن نسخان دہ ثابت مریک ، اگہ اودے گڑتی ارے تو اودے میڈیا و عدلیہ غان بیدس پارلیمانی کمیٹی ٹی طے کروئی مرے۔ اسہ سوج اسے نا ورندی ءِ ترسا اوپارے کہ امریکہ ٹی ہر کس نا حکومت برے تعلقداری تیٹی پرخ بفک انتئے کہ ہموڑے پالیسی تے ادارہ غاک جوڑ کیرہ۔ ڈیہہ ٹی امن نا اڈتننگ کن امریکہ ءِ تینا کڑد ءِ ادا کروئی مرے۔ داوخت آ پلاننگ کمیشن نا کنڈآن سیکرٹری پلاننگ نسیم کھوکھر و یو ایس ایڈ نا مشن ڈائریکٹر جان گرو کے ایم او یو آ دستخط کرے۔