بنجاہی وزیر عبدالقادر بلوچ ءَ پنجگور ءَ نوکیں پاسپورٹ ءِ افتتاح ءُُ نوکیں توان گرڈ سٹیشن ءِ سنگ بنیات ایر کرتگ

پنجگور(پاکستان نیوز پوائنٹ 7نومبر2016ء) بنجاہی وزیر سیم سری ءُُ ریاستی امور لیفٹیننٹ جنرل (ر) عبدالقادر بلوچ ءَ پنجگور ءَ نوکیں پاسپورٹ کا ر گِس ءِ افتتاح ءُُ توان ءِ نوکیں گرڈ سٹیشن ءِ سنگ بنیات ایر کرتگ۔ اے موہ ءَ گپ ءُُ تران کنگ ءَ آئی ءَ گشتگ کہ مزن وزیر محمد نواز شریف ءِ سروکی ءَ ھستیں بنجاہی حکومت بلوچستان ءِ تہا احساس محرومی ءِ ھلاسی ءِ ھاتر ءَ ہر ممکن گام گیج زورگ ءَ انت آئیء َ گشتگ کہ ھستیں حکومت ءِ وھد ءَ بلوچستان ءَ ریکارڈ دیمروی کار بوھگ ءَ انت آئی ءَ گشتگ کہ پنجگور ءَ نوکیں پاسپورٹ کار گِس ءِ افتتاح ءُُ تروان ءِ نوکیں گرڈ سٹیشن ءِ سنگ بنیات ایر کنگ ءَ ھندی مہلوک ءِ گوں کرتگیں ماں یک دِگہ عہد پورا کرتگ انت آئی ءَ گشتگ کہ پاسپورٹ کار گِس اڈ دئیگ ءَ نہ الما مہلوک ءِ مشکل آں کم کنگ ءَ کمک بہ رسیت بلکں روزگار ءِ نوکیں موہ ہم پیداک بیت، آئی ءَ گشتگ کہ تاں 2018ءَ ملک ءَ رتوان ءِ لوڈ شیڈنگ ءِ سرجمی ءَ ھلاسی بیت پرچاکہ توان ءِ نوکیں منصوبہ آنی سرا مزن وزیر نواز شریف ءِ ھاسیں دلچسپی ءِ وجہ ءَ کار برجاہ انت آئی ءَ گشتگ کہ پنجگور ءَ توان ءِ نوکیں گرڈ سٹیشن ءِ سنگ بنیات ایر کنگءَ ہم ہمے منصوبہ آنی یک بہر انت بنجاہی وزیر ءَ گشتگ کہ ھچ راج وانگ ءُُ زانگءَ ابید دیمروی کرت نہ کنت پرچاکہ دیمروی ءِ در وانگ ءُُ زانگ ءِ چابی ءَ پچ بیت آئی ءَ گشتگ کہ بلوچستان ءِ ورنا وانگ ءُُ زانگ ھاس کن فنی وانگ ءِ نیمگءَ دیان بہ دئینت پرچاکہ سی پیک ءِ ردا اڈ بوؤکیں صنعت آں فنی وانگ ءُُ زانگ ءَ فارغ ورنا آنی ھاترءَ روزگار ءِ مزنیں موہ پیداک بوھگ ءَ انت۔