راولپنڈی(پاکستان نیوز پوائنٹ 7نومبر2016ء) پاک فوج انا سروک جنرل راحیل شریف دہشت گردی ٹی اوار پین 9بھلو ڈوہدار دہشت گرد آتا سزائے موت ءِ پک کرے، ہندا دہشت گردآک پشاور ایئر پورٹ آ پی آئی اے نا جہاز آتا لینڈنگ نا وخت آ سم کاری،۔ فوجی افسر ورناو سویلین آ تیا جلہو آتون اوار ایلو دہشت گردی نا سنگین ڈوہ تیٹی اوار ئسر۔ پاک فوج انا شعبہ تعلقات عامہ (آئی ایس پی آر) نا کنڈآن جاری بیان نا رداٹ ساجد ولد ابراہیم خان تحریک طالبان پاکستان انا اسہ سرگرم ءُ باسک اس ئس ، اوپی آئی اے نا پشاور ایئر پورٹ آ لینڈ کروک آ جہاز آتیا سم کاری و کانود نافذ کروک آ ادارہ غاتا ورنا و لس شاری تیا جلہو آتیٹی اوارئس داکارروائی تا نتیجہ ٹی پیر اسرار، نیازگل، اسسٹنٹ سب انسپکٹر ساجد خان تون اوار پین بندغ آک تپاخت کریر، ساجد نا کوزہ آن دھماکہ خیز مواد و سلہہ دوئی کننگاسس، او مجسٹریٹ نا مون آ غٹ دوبہ غاتے امنا کرے ہراڑآ ٹرائل کورٹ اودے سزائے موت بنفیسس۔
جاوید خان ولد فقیر گل تحریک طالبان پاکستان نا اسہ سرگرم ءُ باسک اس ئس ، دا سلہہ بند فوج و کانود نافذ کروک آ ادارہ غاتا ملازم آتیا جلہو آتیٹی اوارئس ہرانا نتیجہ ٹی قیمتی جانی نسخان مس ، دا جلہو آتا وخت شاری رحیم اللہ، سپاہی نصیر احمدو سپاہی باچا حسن ، حوالدار حضرت غنی تپاخت کریسر۔ جاوید خان نا کوزہ آن سلہہ و دھماکہ خیز مواد کوزہ ٹی ہلنگاسس۔
ڈوہدار مجسٹریٹ و عدالت نا مون آ دا غٹ ڈوہ تے امنا کرے ہراڑآ ٹرائل کورٹ سزائے موت بنفیسس۔ فضل الحق ولد شہداد تحریک طالبان پاکستان نا اسہ سرگرم ءُ باسک اس ئس، او چار پولیس کارندہ غاتے برمتہ کرے و اوفتا دوتے گڈا۔ کودک شاری و کانود نافذ کروک آ ادارہ غاتیا جلہو کرے ہرانا نتیجہ ٹی شاری رحمان الرحمان ، عبدالوہاب و پولیس کانسٹیبل سیف تپاخت کریسر۔
ڈوہدار مجسٹریٹ و عدالت نا مون آ داغٹ ڈوہ تے امنا کرے ہراڑآ عدالت سزائے موت بنفیسس۔ فضل الرحمان ولد فضل کریم تحریک طالبان پاکستان نا اسہ سرگرم ءُ باسک اس ئس ۔ دا سلہہ بند فوج و کانود نافذ کروک آ ادارہ غاتیا جلہو آتیٹی اوارئس ہرانا نتیجہ ٹی حوالدار نور مست ، نائیک شبیر نائیک فرمان، سپاہی ہمایوں ، سپاہی فخر عالم، فرنٹیئر کانسٹیبلری نا سپاہی اسماعیل تپاخت کریر و چندی بندغ آک ٹھپی مسوسرڈوہدار مجسٹریٹ و عدالت نا مون آ داڈوہ تے امنا کرینے ہراڑآ عدالت اودے سزائے موت بنفیسس۔
عمر سعید ولد حضرت سعید تحریک طالبان پاکستان نا اسہ سرگرم ءُ باسک اس ئس ، دا سلہہ بند فوج و کانود نافذ کروک آ ادارہ غاتیا جلہو آتیٹی اوار ئس ہرانا نتیجہ ٹی نائب صوبیدار حسن فراز، لانس نائیک روبان علی، سپاہی بدری زمان ، سپاہی گل وزیر، اسسٹنٹ سب انسپکٹر نورزمان تپاخت و ایلوک ٹھپی مسوسر۔ ڈوہدار نا کوزہ آن ناجائز سلہہ و دھماکہ خیز مواد دوئی کننگا ، ڈوہدارمجسٹریٹ و عدالت نا مون آ دا غٹ ڈوہ تے امنا کرے ہراڑآ عدالت ڈوہدار ءِ سزائے موت بنفیسس۔
رحمت ولد اسماعیل خان تحریک طالبان پاکستان نا متحرک ءُ باسک ا س ئس ، او کانود نافذ کروک آ ادارہ و سلہہ بند فوج آ جلہو کرے ہرانا نتیجہ ٹی حوالدار ولی ، سپاہی مطیع، لانس نائیک اسماعیل تپاخت کریر ایلو فوجی ورناک ٹھپی مسوسر۔ ڈوہدار نا کوزہ آن ناجائز سلہہ و بارودی مواد دوئی کننگا، مجسٹریٹ نا مون آ غٹ ڈوہ تے امنا کننگ آ عدالت ڈوہدار ءِ سزائے موت بنفیسس۔
بخت علی ولد عمل خان لشکر اسلام نا اسہ سرگرم ءُ باسک اس ئس، دا سلہہ بند فوج آ جلہو آتیٹی اوار ئس ہرانا نتیجہ ٹی سپاہی محمد ذیشان تپاخت کریسس ، ڈوہدار مجسٹریٹ و عدالت نا مون آ دا ڈوہ تے امنا کرے ہراڑآ عدالت ڈوہدار ءِ سزائے موت بنفیسس۔ نذیر احمد اللہ اداد تحریک طالبان پاکستان نا اسہ سرگرم ءُ باسک اس ئس ، دا کانود نافذ کروک آ ادارہ غاتیا جلہو آتیٹی اوار ئس، ہرانا نتیجہ ٹی پولیس کارندہ ہیڈ کانسٹیبل محمد یوسف تپاخت و ایلوپولیس آک ٹھپی مسوسر، ڈوہدار مجسٹریٹ و عدالت نا مون آ دا ڈوہ تے امنا کرے، ہراڑآ عدالت ڈوہدار ءِ سزائے موت بنفیسس۔
