اسلام آباد(پاکستان نیوز پوائنٹ 7نومبر2016ء) جہانی ادارہ برائے مہاجرین یو این ایچ سی آر مچ آ ملک اٹی رجسٹرڈ اوغان مہاجر آتا پدی ہِننگ نا عمل ءِ 31مارچ 2017ء اسکان موخر کرینے۔ یو این ایچ سی آر نا نمائندہ دوشنبے آ ”اے پی پی“ تون ہیت وگپ کرسا پارے کہ یو این ایچ سی آر اوغانستان آ تیرمہ نا بناء آ رجسٹرڈ اوغان مہاجر آتا وطن آ پدی ہِننگ ءِ 31مارچ 2017ء اسکان موخر کرینے۔
اوپارے کہ اولیکو مرحلہ ٹی بلوچستان آن رضارکارانہ وطن آ پدی ہِننگ نا بنجاک بلیلی ءِ (اینو) سے شنبے 8نومبر آن 31جنوری اسکان بند کرینے وخت اس کہ صوبہ کے پی کے نا پدی ہِننگ نا بنجاک 30نومبر 2016ء اسکان دا رجسٹرڈ مہاجر آتے کن کاریم کرسا کیرہ ہرافک اوغانستان آ پدی ہِننگ نا فارم پُر کرسا تخوک آ تاریخ دوئی کرینو۔ اوپارے کہ جمی وڑاٹ رجسٹرڈ اوغان مہاجر ہرافک یو این ایچ سی آر اٹی وطن آ پدی ہِننگ نا بنجا تیٹی تینا فارم پُر کتنو اوفتا پدی ہِننگ نا عمل 31مارچ 2017ء اسکان موخر کرینے۔
اوپارے کہ رجسٹرڈ اوغان مہاجر آتے پاکستان اٹی غٹ حق دوئی مریک، اوفتے دا بابت وڑانا ویل اس مرے تو او یو این ایچ سی آر آن مفت کمک دوئی کننگ کیرہ۔ اوپارے کہ رجسٹرڈ مہاجر ہرا یو این ایچ سی آر نا پدی ہِننگ نا بنجاٹی تینا فارم آتے پُر کرفنگ آن بیدس اوغانستان آ کارہ اوفتے نقد مالی امداد تننگپک۔
