اسلام آباد(پاکستان نیوز پوائنٹ 7نومبر2016ء) سینیٹ نا ریاستی و سیمی معاملہ نا دیوان ذیلی کمیٹی فاٹا سیکرٹریٹ نا کمامدارآتا سویلی وزیرستان اٹی شونداری اسکیم تیان بابت پورو معلومداری تفننگ آ برہمی نا درشانی ءِ کرینے۔ ذیلی کمیٹی نا دیوان کنوینر سینیٹر صالح محمد شاہ نا کماشی ٹی پارلیمنٹ ہاؤس اٹی مس۔ وزارت سیفران نا کمامدارآک سویلی وزیرستان اٹی چٹفوک آ شونداری اسکیم تیا بریفنگ تس۔
کنوینر کمیٹی داوخت آ ہیت وگپ کرسا پارے کہ کنا معلومداری تا رداٹ سویلی وزیرستان اٹی کل 109شونداری اسکیم چٹانو ہراڑآ فاٹا سیکرٹریٹ نا کمامدارآک پاریر کہ نن تون دا بابت سرجم احوال ساڑی اف ہراڑآ کمیٹی نا باسک و کنوینر برہمی نا درشانی ءِ کرسا پاریر کہ فاٹا کمامدار آتے معلومداری دوئی کننگ کن چھٹی اس نوشتہ کننگاسس ولے دا بابت اینو اسکان معلومداری فراوان کننگ تو۔
کمیٹی سویلی وزیرستان نا چٹفوک آ شونداری اسکیم نان اے ڈی پی ڈٹ آتیٹی اوار کننگ نا سفارش کرینے۔ داوخت آ وزارت سیفران نا جائنٹ سیکرٹری طارق حیات کمیٹی ءِ بریفنگ ترسا پارے کہ سویلی وزیرستان اٹی 36پوسکنوپرائمری اسکول جوڑ جاڑ کننگانے وخت اس کہ گورنر کے پی کے نا تعلیمی پروگرام نا رداٹ فاٹا ٹی ماڈل اسکول اس ہم کاریم کننگ ءِ۔ دیوان اٹی ہدایت اللہ ، سینیٹر ساجد حسین طوری، وزارت سیفران نا سینئر جائنٹ سیکرٹری طارق حیات ، سیکرٹری سوشل ویلفیئر فاٹا سیکرٹریٹ و سویلی وزیرستان نا پولیٹیکل ایجنٹ محمد ظفراللہ خان دیوان اٹی شرکت کریر۔
