کمانڈر سدرن کمانڈ لیفٹیننٹ جنرل عامر ریاض نا 200 آن زیات فراری تا سلہہ بٹنگ و قومی دنگ اٹی اوار مننگ نا وخت آ دود آن تران

کمانڈر سدرن کمانڈ لیفٹیننٹ جنرل عامر ریاض نا 200 آن زیات فراری تا سلہہ بٹنگ و قومی دنگ اٹی اوار مننگ نا وخت آ دود آن تران

کوئٹہ(پاکستان نیوز پوائنٹ 7نومبر2016ء) کمانڈر سدرن کمانڈ لیفٹیننٹ جنرل عامر ریاض پارینے کہ پاکستان و بلوچستان شون و شونہالی نا کسر آروان ءُ پاک چین اقتصادی راہداری ڈٹ آن بلوچستان نا گوادر آن ہلیس شیرانی اسکان غٹ علاقہ غاتا خلقت آک استفادہ کیرہ۔ ہرابندغ آک مش تیٹ تولوک ءُ و انڈیا تون اواری اٹ پاکستان نا برخلاف جنگ کننگ ءُ سلہہ بٹوک آک اوفتے پار کہ او پدی بریر و ہرا خلقت آک قومی دنگ اٹی پدی بننگ کن تیار ءُ نن اوفتے عزت و مابت اٹ سینہ ٹی خلنگ کن تیار اُن۔

داخیال آتا درشانی ءِ او دوشنبے آ وزیراعلیٰ سیکرٹریٹ اٹی 200 آن زیات فراری تا سلہہ بٹنگ و قومی دنگ اٹی اوار مننگ نا وخت آ دود آن تران کرسا کرے۔ اوپارے کہ سہب انا بھولا اگہ شام اتون اُراغا پدی برے تو اودے بھولا پاپسہ پاکستان نا است بھاز بھلن ءِ نن پدی بروک آ خلقت آتے سینہ ٹی خلنگ کن تیار اُن۔ لیفٹیننٹ جنرل عامر ریاض سلہہ بٹوک آتے مخاطب کرسا پارے کہ ای اوفتے سرنڈر آخا بلکن پدی بننگ پاوہ و نم خلقت آک غلط کسرآن سہی انگا کسر نا کنڈا پدی بسونورے ہراڑآ آرمی چیف نا کنڈآن مبارکبادی ایتیوہ۔

اوپارے کہ پاکستان و بلوچستان تدینگوک آ دہ سال آن دہشت گردی نا گواچی ءِ ولے کنے کامل یخین ءِ کہ پاکستان و بلوچستان نا خلقت، طالب علم ، سول سوسائٹی ، دانشور ، بہادر ورناتتون اوار راج انا غٹ بندغ آک اواری اٹ ویل آتا مون ءِ توریرہ۔ لیفٹیننٹ جنرل عامر ریاض پارے کہ ہرابندغ آک مش تیٹ تولوک ءُ و انڈیاتون اواری اٹ پاکستان نا برخلاف جنگ کننگ ءُ سلہہ بٹوک آک اوفتے پار کہ او پدی بریر و ہرابندغ آک قومی دنگ اٹی پدی بننگ کن تیار ءُ نن اوفتے عزت وپار اٹ سینہ ٹی خلینہ۔ اومستی پارے کہ پاکستان اسہ اسلامی فلاحی ریاست اس جوڑ مروئی ءِ ہراڑکن زند انا غٹ تپہ غاتا خلقت آتے تینا کڑد ءِ ادا کروئی مرے۔