وزیراعلیٰ بلوچستان نواب ثناء اللہ خان زہری نا کوئٹہ ٹی فراری تا سلہہ بٹسا قومی دنگ اٹی پدی بننگ آ اڈ ہلوک آ دود آن تران

وزیراعلیٰ بلوچستان نواب ثناء اللہ خان زہری نا کوئٹہ ٹی فراری تا سلہہ بٹسا قومی دنگ اٹی پدی بننگ آ اڈ ہلوک آ دود آن تران

کوئٹہ(پاکستان نیوز پوائنٹ 7نومبر2016ء) وزیراعلیٰ بلوچستان نواب ثناء اللہ خان زہری مش تیا ہنوک آ فراری کمانڈرز آتے سلہہ بٹنگ و قومی دنگ اٹی پدی اوڑدہ مننگ آ ببوخیرٹ پارسا پارے کہ یورپ اٹی تولوک نام نہاد آجوئی نا علمبردارآک ننا مچ آ نسل ءِ تباہ کریر ہراکہ ناقابل معافی جرم اسے۔ پیشن تولوک خلقت آتا ایجنڈہ ءِ کہ ایلم ءِ ایلم تون جنگ ایتبو و او تینا ہندا مقصد آتا پوروی کن تینٹ میدان اٹی بننگ آن بیدس کودک شاری تے کاریم اٹ اتنگ ءُ۔

ولے نن فیصلہ کرینن کہ ہر حالیت اٹی پاکستان و بلوچستان نا الس ءِ امن ترفنگ و وطن عزیز نا دفاع و سلامتی کن ہر قربانی ءِ ایتنہ۔ داہیت ءِ او دوشنبے آ وزیراعلیٰ سیکرٹریٹ اٹی 200 آن زیات فراری تا سلہہ بٹنگ نا وخت آ اڈ ہلوک آ دود آن تران کرسا پارے۔ سلہہ بٹوک آ فراری تیان 75فراری اوغانستان آن بسوسر۔ وزیراعلیٰ بلوچستان نواب ثناء اللہ خان زہری پارے کہ ملک دشمن عنصر آک کودک خلقت آتے سلہہ ترسا ریاست نا برخلاف جنگ کرفنگ ءُ۔

وخت اس کہ تینٹ یورپ نا ماڑی تیٹی تولوک آرام اٹ زند ءِ گدریفنگ ءُ ولے نن فیصلہ کرینن کہ دا گوازی ءِ پین گوازی کننگ کن الیپنہ و ہر حالیت اٹی پاکستان و بلوچستان نا دفاع و رکھ اکن ہر قربانی ءِ ترسا کینہ۔ نواب ثناء اللہ خان زہری پارے کہ کابل ، قندھار ، سپین بولدک اٹی تولوک خلقت آک پدی برسا قومی دنگ اٹی اوار مریر حکومت و عسکری سروک آک اوفتا خیرمقدم ءِ کرسا اوفتے سینہ اٹ خلنگ کن تیار ءُ۔

وزیراعلیٰ بلوچستان سلہہ بٹوک آو قومی دنگ اٹی اوار مننگ آ فراری تے بلوچستان نا الس و حکومت نا کنڈآن مبارکبادی ترسا پارے کہ فراری تا فیصلہ آن بلوچستان آ دورس زئم تمک۔ دود اٹی ایسری آ سلہہ بٹوک و قومی دنگ اٹی اوار مننگ بلوچستان نا کیہی علاقہ غاتیان تعلق تخوک آ بندغ آتے نقد زر ترسا وخت اس کہ دود اٹی قومی ترانہ و ملی نغمہ پیش کرسا طالب علم آتے کن وزیراعلیٰ بلوچستان نواب ثناء اللہ خان زہری 5لکھ روپئی تننگ نا پڑو ءِ کرے۔

دود اٹی کمانڈرسدرن کمانڈر لیفٹیننٹ جنرل عامر ریاض، انسپکٹر جنرل فرنٹیئر کور بلوچستان ، چیف سیکرٹری سیف اللہ چٹھہ ، صوبائی وزراء میر سرفراز بگٹی ، سردار مصطفی خان ترین ، نواب ایاز خان جوگیزئی ، شیخ جعفر خان مندوخیل ، میر مجیب الرحمان محمد حسنی ، نواب محمد خان شاہوانی ، ترجمان حکومت بلوچستان انوارالحق کاکڑ، باسک بلوچستان اسمبلی سردار صالح بھوتانی ، مولوی معاذ اللہ، میر عبدالقدوس بزنجو ، نصراللہ خان زیرے ، لیاقت آغا، میر عاصم کرد گیلو، حاجی اکبر آسکانی ، طاہر محمود خان، وزیراعلیٰ نا سلاہکار حاجی محمد خان لہڑی، عبیداللہ بابت، مرزا شمشاد ، علاؤالدین کاکڑ، جمال شاہ کاکڑ، آغانواب شاہ ، غازی خان پندرانی ، صوبائی سیکرٹری ڈاکٹر اکبر حریفال ، سیکرٹری خزانہ اکبر حسین درانی، سیکرٹری گوازی و امور نوجوان عصمت اللہ خان کاکڑ، سیکرٹری پبلک ہیلتھ انجینئرنگ شیخ نواز مندوخیل، سیکرٹری ملازمت ہائے عمومی نظم و نسق بلال جمالی ئسک ہم ساڑی ئسر۔