اسلام آباد(پاکستان نیوز پوائنٹ 4 نومبر2016ء) بنجائی وزیر دفاعی پیداوار رانا تنویر حسین نا سروکی ٹی گڈانی حادثہ نا جاست وپاست کن جوڑ کروک کمیٹی گڈانی شپ یارڈ نا دورہ ءِ کرے، مہران بیس کراچی ٹی کمامدارآک حادثہ نا بابت بریفنگ تسر۔ ترجمان وزارت دفاعی پیداوار نا رداٹ وزیراعظم محمد نواز شریف گڈانی نا واقعہ نا جاست وپاست کن بنجائی وزیر دفاعی پیداوار رانا تنویر حسین نا سروکی ٹی کمیٹی اس جوڑ کرے۔
کمیٹی نا باسک آک ہرافتے ٹی سیکرٹری کابینہ،سیکرٹری دفاعی پیداوار ، سیکرٹری پورٹس اینڈ شپنگ ، چیف سیکرٹری بلوچستان ، ایڈیشنل سیکرٹری دفاع و منیجنگ ڈائریکٹر کراچی شپ یارڈ اینڈ انجینئرنگ ورکس اوارو۔ جاست و پاستی کمیٹی جمعہ آ گڈانی شپ یارڈ انا دورہ ءِ کرے۔ مہران بیس کراچی ٹی بنجائی وزیر دفاعی پیداوار رانا تنویر حسین نا کماشی ٹی اڈ ہلوک آ اولیکو باضابطہ دیوان اٹی تعلقدار کمامدار آک حادثہ نا بابت بریفنگ تسر۔ وزیراعظم محمد نواز شریف کمیٹی ءِ واقعہ ناسوب دریافت کننگ و زموار آتا تعین نا ٹاسک تسنے۔ بنجائی وزیر رانا تنویر حسین پارے کہ جاست وپاستی کمیٹی 15دے تیٹی تینا رپورٹ ءِ وزیراعظم ءِ پیش کیک، داحادثہ نا ہرکس کہ زموار مریک اونا برخلاف سخت کارروائی کننگک۔
