قومی تاریخ و ادبی میراث ڈویژن کن وزیراعظم نا سلاہکار عرفان صدیقی نا بلوچستان نا پنی سیاسی راہشون، و راجی کارکن حاجی لشکری رئیسانی تون اوڑدہی ٹی ہیت وگپ

قومی تاریخ و ادبی میراث ڈویژن کن وزیراعظم نا سلاہکار عرفان صدیقی نا بلوچستان نا پنی سیاسی راہشون، و راجی کارکن حاجی لشکری رئیسانی تون اوڑدہی ٹی ہیت وگپ

اسلام آباد(پاکستان نیوز پوائنٹ 3 نومبر2016ء) قومی تاریخ و ادبی میراث ڈویژن کن وزیراعظم نا سلاہکار عرفان صدیقی پارے کہ بلوچستان نا جامعہ و علمی ادارہ غاتے معیاری کتاب آتا فراوانی کن لشکری رئیسانی نا کنڈآن بناء کروک آ ”کتاب دوست بلوچستان“ تحریک نا ہروڑاٹ کمک کننگک۔ داہیت ءِ او بلوچستان نا پنی سیاسی راہشون، مسکوہی سینیٹر و راجی کارکن حاجی لشکری رئیسانی تون ہیت وگپ کرسا پارے ہرا پنچ شنبے آ داڑے وزارت نا دفتر اٹی عرفان صدیقی تون اوڑدہی کرے۔

سلاہکار وزیراعظم پارے کہ تعلیم ہر راج انا شون نا بنداوی زینہ ءِ۔ علم انا مون آ دننگ اٹی کتاب نا کڑد بے کچ اہم ءِ ۔ ورنانسل اٹی مطالعہ نا عادت راج اٹی مثبت رویہ غاتا نشوونما ءِ کیک و انتہاپسندی ، تنگ نظری و عدم برداشت نا حوصلہ شکنی مریک۔ عرفان صدیقی تینا وزارت نا رداٹ چلینگوک آ ادارہ نیشنل بک فاؤنڈیشن ، اکیڈمی آف لیٹرز، ادارہ فروغ قومی زبان، اقبال اکیڈمی ، قائد اعظم اکیڈمی و اردوسائنس بورڈ انا کنڈآن بلوچستان نا تعلیمی ادارہ غاتے کن کتب نا فراوانی نا پڑو کرے ہراٹی اردوآن بیدس انگریزی ، بلوچی ، پشتوو سندھی زبان اٹی کتاب آک ہم اوار مریرہ۔

اولشکری رئیسانی نا تحریک ”کتاب دوست بلوچستان“ ءِ اسہ گچین ءُ کوشست اس گوندسا پارے کہ دننگا تحریک آک بایدے ایلو صوبہ غاتیٹی ءِ بناء کیر۔ لشکری رئیسانی سلاہکار وزیراعظم نا منت واری ءِ ادا کرسا پارے کہ کتاب نا ٹیکی آن زیات ہچ ءُ گڑااس اف۔ سلاہکار وزیراعظم حاجی لشکری رئیسانی ءِ گندھارا تہذیب نا بابت آن کتاب نانسخہ اس ہم پیش کرے۔ داوخت آ نیشنل بک فاؤنڈیشن نا ایم ڈی ڈاکٹر انعام الحق جاوید، پاکستان اکیڈمی آف لیٹرز نا سروک پروفیسر ڈاکٹر قاسم بگھیو ، ادارہ فروغ قومی زبان نا ایگزیکٹو ڈائریکٹر گودی تحسینہ جہان، قومی تاریخ و ادبی میراث ڈویژن نا جوائنٹ سیکرٹریز سید جنید اخلاق، مشہور مرزا و ڈپٹی سیکرٹری سہیل مفتی ہم ساڑی ئسر۔